Qazaqstandyq 17 jasar sportshy Olımpıada joldamasyna talasady

<p>ASTANA. KAZINFORM &mdash; Qytaıdyń Taıan qalasynda taekvondodan ótetin lıtsenzııalyq týrnırde 17 jasar sportshymyz Olımpıada joldamasyna talasady.</p>

Sportty damytý dırektsııasynyń baspasóz qyzmeti málim etkendeı, Azııa qurlyǵynyń irikteý týrnıri 15-16 naýryz aralyǵynda ótedi

Atalǵan týrnırde el namysyn qorǵaıtyn sportshylarymyzdyń arasynda 17 jasar Batyrhan Tóleýǵalı da bar. Ol 80 keli salmaqta Olımpıada joldamasyna talasady. Tóleýǵalı jastar arasyndaǵy álem chempıonatynyń qola júldegeri (2022), QR VI jazǵy Spartakıadasynyń jeńimpazy atanǵan.

Foto: Shamken Baıyrbek

Ekinshi sportshymyz 19 jasar Marııa Sevostıanova. Ol 57 keli salmaqta synǵa túsedi. Sevostıanova Olımpıada reıtınginde 44-orynda tur. QR VІ jazǵy Spartakıadasynyń jeńimpazy.

Úshinshi sportshymyzdyń jasy endi ǵana 20 ǵa tolǵan. 58 keli salmaqta el namysyn qorǵaıtyn Samırhon Ababakırov Olımpıada reıtınginde 39-orynda keledi.

Tórtinshi sportshymyz quramanyń kóshbasshysy - Jansel Denız. +67 keli salmaqta el namysyn qorǵap júrgen taekvondoshymyz 33 jasta. Olımpıada reıtınginde 14-orynda tur.

Joǵarydaǵy 4 sportshynyń ishinde Janselden basqasy alǵash ret Olımpıada lıtsenzııasy úshin talasady. Denız Rıo (2016 j) men Tokıo Olımpıadasyna (2021 j) qatysqan.

Qytaıdaǵy jarysta Parıj Olımpıadasynyń joldamasyna ár salmaqta fınalǵa shyqqan eki sportshy ıe bolady. Barlyǵy týrnırde 33 memleketten kelgen tańdaýly 96 taekvondoshy kúsh synasady.

Bul sary qurlyq ókilderine lıtsenzııa beriletin sońǵy jarys ekenin aıta keteıik.

Qazir bas bapker Nursultan Mamaev bastaǵan Ulttyq qurama Taıan qalasynda daıyndyǵyn pysyqtap jatyr.

Alǵash bolyp 15 naýryzda daıangqa Batyrhan Tóleýǵalı shyǵady. Al qalǵan 3 atletimiz ertesine, ıaǵnı sońǵy jarys kúni sheberligin pash etedi.