Qazaqstandy maqtan tutamyn: Ksenııa Sobchak Bıshimbaevtyń isi týraly aıtty
Ortalyq Azııa áıelderiniń forýmyna arnaıy kelgen Ksenııa Sobchak turmystyq zorlyq-zombylyqtan qaıtys bolǵan Saltanat Núkenovanyń soty týraly aıtty.
«Ózderińiz bilesizder men kóktemde Qazaqstanǵa qaıǵyly jaǵdaıda keldim. Turmystyq zorlyq-zombylyqtyń qurbany bolǵan Saltanat Núkenovanyń soty týraly aıtyp otyrmyn. Men qoǵamdyq rezonans týdyrǵan máseleni ashyq kórsetip, durys sheshim qabyldaǵany úshin Qazaqstandy maqtan tutamyn»,- dedi ol.
Onyń aıtýynsha, sanany ózgertý eń qıyn nárse jáne ony birtindep júzege asyrý kerek.
«Al qoǵamnyń qysymy jaǵdaıdy qalaı ózgerte bastady, zorlyq-zombylyq qurbandaryna degen kózqaras ózgerdi», - dedi Ksenııa Sobchak.
Sondaı-aq, ol qazaqstandyq áıelderdiń názik ári er minezdi ekenin tilge erekshe atap ótti.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy.
Bul is elimizde úlken qoǵamdyq rezonans týdyryp, sot otyrystary onlaın ótti. Nátıjesinde Qýandyq Bıshimbaev 24 jylǵa bas bostandyǵynan aıyryldy.
Osy protsester kezinde Ksenııa Sobchak sot otyrysyna qatysý úshin Qazaqstanǵa arnaıy kelgen bolatyn.
Keıin QR Syrtqy ister mınıstrliginiń resmı ókili Aıbek Smadııarov reseılik jýrnalıst Ksenııa Sobchak pen bloger Natalıa Greıstiń Qazaqstandaǵy sot otyrysyna qatysýy týraly pikir bildirdi.
Aıta keteıik, bıyl 12 sáýirde «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańy men ilespe qujat eki oqylymda qaralyp, maquldanǵan edi. Dál osy zań el ishinde ǵana emes kórshiles Reseı qoǵamynda da qyzý talqyǵa túsken edi.