Qazaqstandy aıyptaý keıbir kúshterge tıimdi – Berik Ýálı Sadyqovqa jasalǵan qastandyq týraly
Sondaı-aq Berik Ýálı zardap shekken azamattyń jubaıy Natalıa Sadyqovanyń olardyń arnasy «Prezıdenttiń tamaǵyna turyp qalǵan qyltan» degen oıyna qatysty pikir bildirdi.
«Qaıdaǵy qyltan? Memleket basshysy bul resýrsqa eshqashan qyzyǵýshylyq tanytyp, qaraǵan emes. Qazaqstanda ártúrli baǵyttaǵy ondaǵan, tipti júzdegen osyǵan uqsas arnalar men saıttar jumys isteıdi. Olar jumysyn jalǵastyryp jatyr. Atalǵan resýrsqa keletin bolsaq, ol eshqashan ishki aqparattyń kún tártibine erekshe áser etken emes. Onyń ústine, kóptegen adam onyń bar ekendigi týraly Kıevtegi oqıǵadan keıin ǵana bildi», — dedi Berik Ýálı.
Sondaı-aq, Prezıdenttiń baspasóz hatshysy «El basshylyǵynyń strategııalyq baǵytyn, onyń ishinde syrtqy saıasat salasyndaǵy baǵdaryn ózgertý úshin Qazaqstannyń atyna aıyptaýlar taratyp, qysym jasaýdy tıimdi paıdalanatyn kúshter bar» dep paıymdaıdy. Berik Ýálıdiń aıtýynsha, qylmys Ýkraına aýmaǵynda jasalǵandyqtan, tergeýdi osy eldiń quzyrly vedomstvolary júrgizedi.
«Memleket basshysynyń tapsyrmasy boıynsha bizdiń quqyq qorǵaý organdary belgilengen rásimderge sáıkes qosymsha aqparat alý úshin Ýkraına tarapyna júginedi jáne qajet bolǵan jaǵdaıda tergeýge járdem kórsete alady. Buryn Aıdos Sadyqovqa taǵylǵan aıyptarǵa qaramastan, ol áýeli Qazaqstan azamaty ekenin eskerýimiz kerek. Tıisinshe, ol óziniń otbasymen birge óz quqyqtaryn paıdalanady. Konstıtýtsııaǵa sáıkes, shekaradan tys jerde bolsa da, olar memlekettiń qoldaýy men qorǵaýyna senim arta alady. Sondyqtan Prezıdent tıisti memlekettik jáne dıplomatııalyq qyzmetterge, eger olardyń kelisimi bolsa, Sadyqovtar otbasyna barlyq qajetti kómekti kórsetýdi tapsyrdy», — dep tolyqtyrdy baspasóz hatshy.
Aıta ketsek, buǵan deıin Memleket basshysy Qasym-Jomart Toqaev Kıevte qastandyq jasalǵan Qazaqstan azamaty jaıynda pikir bildirgen edi.