Qazaqstandaǵy jylýmen jabdyqtaý jelileriniń 40 paıyzy tozǵan
«Búgin Úkimet otyrysynda jylýmen jabdyqtaý sektoryn jańǵyrtý máseleleri qaraldy. Búgingi kúni bul sektordaǵy negizgi quraldardyń tozý deńgeıi tym joǵary. Máselen, jelilerdiń 40 paıyzy 100 paıyzǵa tozǵan. Sondaı-aq, Jylý elektr stansalary men iri qazandyqtardy qospaǵanda, jylýmen jabdyqtaý kózderiniń jaǵdaıy da máz emes», - dedi B.Jámishev.
Onyń aıtýynsha, jylý jelilerin jańǵyrtý jónindegi keshendi jospar ázirlenetin bolady. Ol josparda jylý kózderiniń tehnıkalyq tekseristen ótkizý sharalary qamtylady. Sonyń nátıjesi boıynsha jylý jelileriniń tehnıkalyq jaǵdaıyna baǵa beriledi, ınvestıtsııalaýdyń negizdemesi ázirlenedi, qalalar men aýyldardy jylýmen jabdyqtaýdyń syzbanusqasy daıyndalady.
«Budan bólek, osy sektorda memlekettik-jekemenshik áriptestikti damytý máseleleri de qarastyrylady. Tarıftik saıasatty reformalaý jumystary da atqarylmaq. Jalpy alǵanda, osyndaı usynystardy saralaý negizinde elimizdiń jylýmen jabdyqtaý sektoryn reformalaý tujyrymdamasyn bekitýdi josparlaımyz», - dedi B. Jámishev.