Qazaqstandaǵy jumys kúshiniń 60% mıllenıaldar men Z býyn enshisinde

NUR-SULTAN. QazAqparat – Álemdik ekonomıkadaǵy qubylmaly jaǵdaı jáne elimizdegi demografııalyq ózgerister ulttyq eńbek naryǵyna áserin tıgizýde. Bul týraly QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Bul saladaǵy eń iri ózgeris – jumys kúshiniń jańa legi paıda bolýynan týyndap otyr. Qazir 2000 jyldardan keıin dúnıege kelgen urpaq eseıip, er jetip keledi. Jyl saıyn osyndaı 300 myńnan astam jas eńbek naryǵyna qosylýda. Sonyń nátıjesinde jumys kúshiniń jańa sapalyq qurylymy qalyptasyp jatyr. Búginde elimizdegi jalpy jumys kúshiniń 60 paıyzy mıllenıaldar (1981-1996 jylǵylar) men Z (odan keıingi) býynnyń enshisinde. 2030 jylǵa qaraı bul kórsetkish 80 paıyzǵa jýyqtaǵaly otyr», - dedi T. Dúısenova Úkimet otyrysynda.

Osy úrdis, qazirgi kúrdeli ahýal jáne aldaǵy yqtımal syn-qaterler jumyspen qamtý saıasatyn qaıta qaraý qajettigin kórsetip otyr. Onda azamattardy jaı jumyspen qamtý emes, shyn máninde sapaly jumys ornyn berý arqyly halyqtyń tabysyn arttyrý basty mindet bolmaq.

«Bul mindetti oryndaý úshin qazir júzege asyrylyp jatqan is-sharalarmen qatar, birqatar jańa baǵyttar boıynsha jumysty jandandyrý usynylady. Birinshi kezektegi másele – jastardy jumysqa tartý. Bul úshin iri jáne orta kásiporyndardaǵy bos jumys oryndaryna onlaın jármeńke ótkizý arqyly jastardy eńbekpen qamtýdy qolǵa aldyq», - dedi Tamara Dúısenova.