Qazaqstandaǵy joldardyń boıyna maldy úrkitetin qurylǵylar ornatylyp jatyr

NUR-SULTAN. QazAqparat - Respýblıkalyq mańyzy bar avtojoldardyń qaýipsizdigi men jaıylyp júrgen maldyń jolǵa shyǵyp ketpeýi úshin arnaıy sharalar qolǵa alyndy, dep habarlaıdy QR Indýstrııa jáne ınfraqurylymdyq damý mınıstrliginiń resmı saıty.

Saıttaǵy derekterge qaraǵanda, eldegi tasjoldardyń boıyna janýarlardy úrkitetin ýltradybystyq qurylǵylar men «elektrli baqtashy» qorshaýlary ornatyldy.

Bul jumystar eń aldymen, Mańǵystaý oblysynda bastalǵan. Onda «Qazaqavtodor» jaýapkershiligi shekteýli seriktestiginiń fılıaly arnaıy qorshaýlar ornatqan. Kerneýi 12 volt bolatyn 3000 metrlik «elektrli baqtashy» «Dossor - Kulsary - Beı̆neý - Saı̆ - Ótes - Shetpe - Jetibaı̆ - Aqtaý t.p.» avtojolynyń 723-726 shaqyrymyndaǵy ýchaskesiniń boıyna qoıylǵan.

«Elimizde maldyń jolǵa shyǵyp ketýinen bolatyn kólik apattary jıilep ketti. Mysaly, tek bıylǵy jyldyń alǵashqy jartyjyldyǵynda janýarlardy basý sebebinen 16 jol kólik oqıǵasy tirkelgen. Nátıjesinde 33 adam jaraqat alyp, ekeýi mert boldy. Byltyr osyǵan sáıkes kezeńde 23 jol kólik apaty boldy. Onda 29 adam zardap shegip, jeteýi kóz jumdy.

Jol kólik oqıǵalarynynyń artýyna respýblıkalyq joldardyń boıyndaǵy torly qorshaýlardyń urlanýy da sebep bolyp otyr. Jaǵdaı, ásirese túnde qıyndaı túsedi. Qarańǵyda túk kórinbeı ketedi. Onyń ústine, janýarlarǵa jaryq shaǵylystyratyn lentalar taǵylmaıdy. Sol sebepten jol qyzmetkerleri maldy joldan qaýipsiz qashyqtyqqa qýýǵa májbúr bolady. Bul máseleni «elektrli baqtashylar» jobasy sheshedi. Zamanaýı qorshaýlar elimizdiń ózge óńirlerinde de ornatylatyn bolady»,-delingen habarlamada.