Qazaqstandaǵy jergilikti mańyzǵa ıe joldardyń 37 paıyzy jóndeýdi qajet etedi
Bul týraly búgin Májilistiń Ekonomıkalyq reforma jáne óńirlik damý komıtetiniń keńeıtilgen otyrysynda QR Investıtsııalar jáne damý mınıstriniń birinshi orynbasary Jeńis Qasymbek málim etti. Eske sala keteıik, otyrys barysynda «Nurly jol - bolashaqqa bastar jol» jańa ekonomıkalyq saıasatynyń sheńberindegi kólik ınfraqurylymyn damytý máseleleri talqylanǵan bolatyn.
Mınıstr orynbasarynyń sózine qaraǵanda, 2014 jyldyń qorytyndysy boıynsha elimizdegi jergilikti mańyzǵa ıe joldardyń 37 paıyzy qanaǵattanarlyqsyz deńgeıde ekeni anyqtalǵan. Sonyń ishinde Aqtóbe, Atyraý, Batys Qazaqstan jáne Soltústik Qazaqstan oblystarynda bul kórsetkish tipti 50 paıyzǵa deıin artyp ketken.
«Osyǵan baılanysty biz jergilikti ákimdiktermen birlese otyryp, oblystyq, aýdandyq joldardyń tehnıkalyq jaǵdaıyn jaqsartýǵa qatysty jumystardy atqarmaqpyz. Bul rette jergilikti mańyzǵa ıe joldardy qarjylandyrý mólsheri aǵymdaǵy jyly 80 mlrd. teńgeden asatyn bolsa, sonyń ishinde respýblıkalyq bıýdjettiń nysanaly sıpattaǵy transfertteri 17,5 mlrd. teńgeni, jalpy sıpattaǵy transfertter kólemi 25,3 mlrd teńgeni, al jergilikti bıýdjetten qosymsha qarjylandyrý kólemi 37,5 mlrd. teńgeni quramaq. Tutastaı alǵanda, qarastyrylyp otyrǵan qarajatqa respýblıkanyń barlyq aýmaqtary boıynsha jol-jóndeý jumystarynyń barlyq túrlerimen 2,5 myń shaqyrym avtojoldar qamtylady», - dedi Jeńis Qasymbek.
Budan bólek, mınıstr orynbasary keıbir óńirlerde jergilikti bıýdjet esebinen joldardyń jaǵdaıyn jaqsartýǵa baǵyttalǵan aýqymdy jumystardyń atqarylyp jatqanyna da nazar aýdardy. Máselen, onyń sózine qaraǵanda, Almaty jáne Ońtústik Qazaqstan oblystary sońǵy jyldary 10 mlrd. teńgege deıin qarajatty joldardyń sapasyn jaqsartýǵa jumsap keledi. «Ol oblystarda jergilikti mańyzǵa ıe joldardyń jaǵdaıy Qazaqstannyń basqa óńirlerine qaraǵanda aıtarlyqtaı jaqsy», - dedi J. Qasymbek.