Qazaqstandaǵy jaıylymdarda qansha qudyq qazyldy

NUR-SULTAN. QazAqparat - Búgin Úkimet otyrysynda QR Aýyl sharýashylyǵy mınıstri Erbol Qarashókeev jaıylymdar qudyq qazý jumystary týraly aıtty, dep habarlaıdy QazAqparat tilshisi.

«Jaıylymdardy sýlandyrý maqsatynda 2014-2020 jyldar kezeńinde elimiz boıynsha 8 555 qudyq qazyldy, sonymen birge 11,9 mln gektar jaıylymdy sýlandyrýǵa múmkindik berdi. Memleket basshysynyń bıylǵy 1 qyrkúıektegi Qazaqstan halqyna Joldaýynda aıtylǵan tapsyrmasyna sáıkes, jaıylymdardy sýlandyrý úshin qudyqtar qazý kezindegi shyǵyndardy óteý úlesin 50%-dan 80%-ǵa deıin arttyrý jumystary júrgizilýde», - dedi Erbol Qarashókeev.

Onyń aıtýynsha, Ekologııa, geologııa jáne tabıǵı resýrstar mınıstrligi oblystar ákimdikterimen birlesip, jaıylymdyq alqaptardaǵy jer asty sýlarynyń qorlaryn rastaý jónindegi jumysty jandandyrýy qajet.

«Budan basqa, oblystar ákimdikteri qoldanystaǵy zańnama sheńberinde ıesiz qudyqtardy túgendeý jáne anyqtaý jumystaryn júrgizip, keıinnen mal sýarýǵa arnalǵan pýnktterdi belgileýi kerek», - dedi mınıstr.