Qazaqstandaǵy jańa kadrlyq taǵaıyndaý
Atalǵan vedomstvolardyń basshylary da Memleket basshysynyń Jarlyǵymen taǵaıyndaldy. Munan bólek, osy aptada QR Prezıdenti Ákimshiligi basshysynyń orynbasary, QR Prezıdentiniń kómekshisi, QR Joǵarǵy soty keńesiniń tóraǵasy taǵaıyndalǵany belgili boldy. QazAqparat osy jáne ózge de taǵaıyndaýlarǵa sholý jasaıdy.
Sonymen Memleket basshysy Nursultan Nazarbaevtyń Jarlyǵymen Talǵat Sovetbekuly Donaqov Qazaqstan Respýblıkasynyń Memlekettik qyzmet isteri mınıstri bolyp taǵaıyndaldy.
T.Donaqov 1965 jyly týǵan. S.M.Kırov atyndaǵy Qazaq memlekettik ýnıversıtetin, KSRO Ǵylym akademııasyndaǵy Memleket jáne quqyq ınstıtýtynyń aspırantýrasyn bitirgen. Mamandyǵy boıynsha - zańger. Zań ǵylymdarynyń kandıdaty ǵylymı ataǵy bar, aǵylshyn tilin meńgergen. Respýblıka Ǵylym akademııasynyń Memleket jáne quqyq ınstıtýtynyń kishi ǵylymı qyzmetkeri, ǵalym-hatshysy bolyp jumys istedi. 1992-1994 jyldary Qazaqstan Respýblıkasy Joǵarǵy Keńesi Tóraǵasynyń keńesshisi, kómekshisi, keıinnen Zańnama, quqyqtyq saraptaý jáne taldaý máseleleri bólimi meńgerýshisiniń orynbasary boldy. Prezıdent Ákimshiliginiń Memlekettik quqyq bóliminiń sektor meńgerýshisi, bólim meńgerýshisiniń orynbasary, bólim meńgerýshisiniń birinshi orynbasary laýazymdarynda qyzmet atqardy. Ádilet birinshi vıtse-mınıstri, Prezıdent Ákimshiliginiń Memlekettik quqyq bóliminiń meńgerýshisi, Qazaqstan Respýblıkasy Joǵary Sot Keńesiniń Tóraǵasy laýazymdaryna taǵaıyndalǵan. 2008 jylǵy qazannan - Qazaqstan Respýblıkasy Prezıdentiniń Ákimshiligi Basshysynyń orynbasary.
Jańadan qurylǵan Sybaılas jemqorlyqqa qarsy is-qımyl ulttyq bıýrosynyń basshylyǵyna Qaırat Perneshuly Qojamjarov keldi. Ol 1965 jyly týǵan. A.Jdanov atyndaǵy Lenıngrad memlekettik ýnıversıtetin bitirgen. 1987 jyldan bastap 1995 jylǵa deıin Qazaqstan Respýblıkasy prokýratýrasynyń organdarynda qyzmet etken. 1995 jylǵy qyrkúıekten bastap 1998 jylǵy naýryzǵa deıin keden organdarynda qyzmette bolǵan. 1999 jylǵy shildeden bastap osy ýaqytqa deıin qarjy polıtsııasy organdarynda qyzmet etti. Ár túrli laýazymdarda: 2001 jylǵy aqpannan bastap Agenttiktiń tergeý basqarmasynyń bastyǵy, 2002 jylǵy aqpannan bastap 2004 jylǵy mamyrǵa deıin Almaty qalasy boıynsha Ekonomıkalyq qylmysqa jáne sybaılas jemqorlyqqa qarsy kúres departamenti (qarjy polıtsııasy) bastyǵynyń orynbasary, 2004 jylǵy mamyrdan bastap 2007 jylǵy qańtarǵa deıin Aqtóbe oblysy boıynsha Ekonomıkalyq qylmysqa jáne sybaılas jemqorlyqqa qarsy kúres departamenti (qarjy polıtsııasy) bastyǵy, 2007 jylǵy qańtardan bastap 2008 jylǵy jeltoqsanǵa deıin Qazaqstan Respýblıkasy Ekonomıkalyq qylmysqa jáne sybaılas jemqorlyqqa qarsy kúres agenttigi (qarjy polıtsııasy) Tóraǵasynyń orynbasary boldy. 2008 jylǵy jeltoqsan aıynan bastap Qazaqstan Respýblıkasy Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy qyzmetin atqardy. Keıin Aqmola oblysyn basqardy. Jańa qyzmetke taǵaıyndalǵanǵa deıin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy qyzmetin atqardy. Qarjy polıtsııasynyń general-maıory. ІI dárejeli «Dańq» ordenimen, Reseı Federatsııasynyń "Za nashý pobedý" ordenimen jáne birqatar medaldarmen marapattalǵan.
Al QR Prezıdenti Ákimshiligi basshysynyń orynbasary qyzmetine kelgen Marat Baqytjanuly Beketaev 1977 jyly týǵan. Qazaq Memlekettik zań ýnıversıtetin, London ekonomıka jáne saıası ǵylymdar mektebin bitirgen, mamandyǵy boıynsha - zańger, quqyqtaný masteri. «Bolashaq» baǵdarlamasynyń túlegi, aǵylshyn tilin meńgergen. Eńbek jolyn Qazaqstan Respýblıkasyndaǵy Brıtan keńesiniń zańgeri bolyp bastaǵan. Syrtqy ister mınıstrliginiń «Dıplomatııalyq korpýsqa qyzmet kórsetý basqarmasy» JAQ sektor meńgerýshisi, bólim bastyǵy bolyp jumys istedi, keıin Memlekettik qyzmet isteri agenttiginiń basqarma bastyǵy boldy. Eýrazııalyq memlekettik qyzmetshilerdi oqytý ortalyǵy dırektorynyń orynbasary laýazymynda qyzmet atqardy. Qazaqstan Respýblıkasy Premer-Mınıstri orynbasarynyń keńesshisi, Premer-Mınıstrdiń keńesshisi boldy. Ádilet vıtse-mınıstri qyzmetine taǵaıyndaldy. 2010 jylǵy sáýirden - Qazaqstan Respýblıkasy Ádilet mınıstrliginiń jaýapty hatshysy.
QR Prezıdenti kómekshisi qyzmetine kirisken Álıhan Ashanuly Smaıylov 1972 jyly týǵan. Ál-Farabı atyndaǵy Qazaq memlekettik ulttyq ýnıversıtetin, Qazaqstan Respýblıkasy Prezıdentiniń janyndaǵy Qazaqstannyń menedjment, ekonomıka jáne boljaý ınstıtýtyn bitirgen. Mamandyǵy boıynsha - matematık, memlekettik basqarý magıstri. Aǵylshyn tilin meńgergen. Eńbek jolyn «A-Invest» ınvestıtsııalyq jekeshelendirý qorynyń baǵaly qaǵazdar jónindegi bas mamany bolyp bastady. 1996-1998 jyldary Qazaqstan Respýblıkasy Ulttyq statıstıka agenttiginiń bas basqarmasy bastyǵynyń orynbasary, basqarma bastyǵy bolyp jumys istedi. Prezıdent Ákimshiliginiń Áleýmettik-ekonomıkalyq taldaý bóliminiń sektor meńgerýshisi, Uıymdastyrý-baqylaý bóliminiń memlekettik ınspektory laýazymdarynda qyzmet atqardy. «Eksportty kredıtter men ınvestıtsııalardy saqtandyrý jónindegi Memlekettik saqtandyrý korporatsııasy» AQ, «KazAgro» Ulttyq holdıngi» AQ basqarma tóraǵasy boldy. Syrtqy ister vıtse-mınıstri, Qarjy vıtse-mınıstri, Statıstıka agenttiginiń tóraǵasy laýazymdaryna taǵaıyndalǵan. 2014 jylǵy tamyzdan - Qazaqstan Respýblıkasy Ulttyq ekonomıka mınıstrliginiń Statıstıka agenttiginiń tóraǵasy.
QR Prezıdenti Jarlyǵymen QR Joǵarǵy soty keńesiniń tóraǵasy bolǵan Anatolıı Sergeevıch Smolın 1959 jyly týǵan. Sverdlovsk zań ınstıtýtyn bitirgen. Mamandyǵy boıynsha - zańger. Kókshetaý oblysy Krasnoarmeısk aýdandyq halyqtyq sotynyń sýdıasy, tóraǵasy, Soltústik Qazaqstan oblysynyń Taıynsha aýdandyq sotynyń tóraǵasy bolyp jumys istedi.
1998-2002 jyldary Soltústik Qazaqstan oblystyq sotynyń qylmystyq ister jónindegi sot alqasynyń tóraǵasy boldy. Qazaqstan Respýblıkasy Joǵarǵy Sotynyń sýdıasy, qadaǵalaý alqasynyń tóraǵasy laýazymdarynda qyzmet atqardy. 2010 jylǵy aqpannan - Qazaqstan Respýblıkasy Joǵarǵy Sotynyń sýdıasy.
Sonymen qatar osy aptada Memleket basshysy Nursultan Nazarbaevtyń Ókimimen Qazaqstan Respýblıkasy Ulttyq Banki tóraǵasynyń orynbasarlary qyzmetine Alpysbaı Rahmetollauly Ahmetov, Ǵalymjan Oljaıuly Pırmatov taǵaıyndalǵany belgili boldy.
Musa Turmanuly Tanabaev QR Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń «Kásibı áskerılendirilgen avarııalyq-qutqarý qyzmeti» sharýashylyq júrgizý quqyǵyndaǵy respýblıkalyq memlekettik kásiporny basshysy bolyp taǵaıyndaldy. Musa Turmanuly 1965 jylǵy 1 aqpanda Jezqazǵan oblysynyń Jezqazǵan kentinde dúnıege kelgen. 1987 jyly Qazaq polıtehnıkalyq ınstıtýtyn «taý-ken ınjener-elektrıgi» mamandyǵy jáne 1994 jyly Qaraǵandy memlekettik ýnıversıtetin ekonomıst mamandyǵy boıynsha bitirgen, ekonomıka ǵylymdarynyń kandıdaty. 2006-2008 jyldary Jezqazǵan qalasynyń ákimi. 2008-2010 jyldary Tótenshe jaǵdaılardy jáne ónerkásiptik qaýipsizdikti memlekettik baqylaý komıtetiniń Munaıgaz ónerkásibin memlekettik baqylaý basqarmasynyń bastyǵy bolyp qyzmet etti. 2010-2011 jyldary Qazaqstan Respýblıkasy Tótenshe jaǵdaılar mınıstrliginiń Ońtústik Qazaqstan oblysy boıynsha Tótenshe jaǵdaılar departamenti bastyǵynyń orynbasary. 2011-2013 jyldary Qazaqstan Respýblıkasy Tótenshe jaǵdaılar mınıstrliginiń Tótenshe jaǵdaılardy jáne ónerkásiptik qaýipsizdikti memlekettik baqylaý komıteti tóraǵasynyń orynbasary boldy. 2013 jylǵy naýryzdan 2014 jylǵy qarashaǵa deıin Qostanaı oblysy boıynsha Tótenshe jaǵdaılar departamentiniń bastyǵy laýazymynda qyzmet etti. 2014 jylǵy qarashadan qazirgi ýaqytqa deıin Qazaqstan Respýblıkasy Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń Qostanaı oblysy boıynsha departamenti» MM basshysy laýazymyn atqardy. Memlekettik jáne halyqaralyq nagradalary, syılyqtary, qurmetti ataqtary: Qazaqstan Respýblıkasy Prezıdentiniń alǵys haty, «Qazaqstan Resýpblıkasynyń Táýelsizdigine 20 jyl» mereıtoılyq medali, «Tótenshe jaǵdaılardyń aldyn alýda jáne joıýda úzdik shyqqany úshin» medali, І, ІІ dárejeli jáne ІІІ dárejeli «Eńbek dańqy» tósbelgisi, «Tótenshe jaǵdaılar júıesin damytýǵa qosqan úlesi úshin» tósbelgisi, «Eren eńbegi úshin» belgisi.
Shyǵys Qazaqstan oblysy Bilim basqarmasyna jańa basshy taǵaıyndaldy. Ol - ShQO Jumyspen qamtýdy úılestirý jáne áleýmettik baǵdarlamalar basqarmasynyń basshysy qyzmetinde bolǵan Aıjan Syzdyqova. D. Serikbaev atyndaǵy Shyǵys Qazaqstan memlekettik tehnıkalyq ýnıversıtetinde jumys istegen Aıjan Sadyqova ShQO bilim berý departamenti bastyǵynyń orynbasary, bilim berý basqarmasy bastyǵynyń orynbasary bolǵan.
«Atameken» QR UKP tóraǵasynyń jańa orynbasary taǵaıyndaldy. Bul qyzmetke Tólemis Shotanov keldi. Ol buryn Palatanyń aqtóbelik dırektsııasyna basshylyq etken bolatyn, keıin Óńirlik damý departamentiniń basqarýshy dırektory - dırektor laýazymynda boldy.
Almaty oblysy Kásipkerler palatasynda da ózgerister oryn aldy. Onda ÓKP Óńirlik keńesiniń jańa tóraǵasy bolyp Rımma Salyqova saılandy. Ol óńirge tanymal tulǵa, Almaty oblysy Іsker áıelder qaýymdastyǵyn basqarady, Almaty oblysy ákiminiń janyndaǵy áıelder isi jáne otbasy-demografııalyq saıasat jónindegi komıssııa múshesi, «Nur Otan» partııasy Saıası keńesiniń múshesi, «Almaty boıaýlary» JShS dırektory.