Qazaqstandaǵy zerttelmegen shógindi alaptardyń áleýeti aıqyndalady

NUR-SULTAN. QazAqparat – Qazaqstanda geologııalyq barlaýdyń 2021-2025 jyldarǵa arnalǵan memlekettik baǵdarlamasy ázirlenip jatyr. Bul týraly Oortalyq kommýnıkatsııalar qyzmetinde ótken baspasóz máslıhatynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Taýly ári kendi aýdandardaǵy shógindi alaptardyń munaıly áleýetin aıqyndap, «tereń kókjıekterin» zertteý josparda bar», - dedi Maǵzum Myrzaǵalıev OKQ-da ótken baspasóz máslıhatynda.

Mınıstrdiń aıtýyna qaraǵanda, memlekettik baǵdarlamany iske asyrýdyń arqasynda 2025 jylǵa deıin áleýetti degen 40 ýchaskeni anyqtap, kómirsýtekter resýrstaryna aıqyn boljam jasaýǵa bolady.

«Bul geologııalyq salanyń áleýeti zor ekenin kórsetedi. Geologııalyq ǵylymǵa da basa nazar aýdarylǵaly otyr. Aımaqtyq izdeý jáne barlaý satysyndaǵy jumystardy taldaý jáne ǵylymı-zertteý jumystaryna basymdyq beriledi. Memlekettik baǵdarlamany 2020 jyldyń alǵashqy jartyjyldyǵynda bekitý kózdelgen. 2019 jyly 76 nysanǵa geologııalyq barlaý júrgizilgen bolatyn. Osy jumystyń arqasynda respýblıkalyq barlyq óńirinde áleýetti nysandary men boljamdy resýrstary aıqyndalyp, tereńirek geologııalyq jumys júrgizý boıynsha keńes berildi», - dedi Maǵzum Myrzaǵalıev.