Qazaqstandaǵy úzdik startap-jobalar ınvestorlarǵa tanystyrylady
Baǵdarlamanyń iske qosylýyna arnalǵan shara barysynda Astana Hub halyqaralyq IT-startaptar tehnoparkiniń basshysy Maǵjan Mádıev «Garage» jáne «C-Lab» startap-baǵdarlamalarynyń qazirgi nátıjelerimen bólisti.
«Atalǵan baǵdarlamalar aıasynda biz ıdeıa jáne prototıp kezeńinde turǵan startap-komandalarmen jumys júrgizemiz. «Garage» preakseleratsııalyq baǵdarlamasyna bizge 151 ótinim kelip tústi, olardyń ishindegi 43 joba Demo Day-ge ótkizildi. Eń basty talap jobanyń aýqymyn keńeıtýge bolatyndyǵymen baılanysty. «C-lab» baǵdarlamasyna 100-den asa ótinim jiberildi. Búgin qatysýshylar alǵash ret korporatsııalarmen kezdesip otyr, ary qaraı komandalarmen etene jumys júrgizilip, aqparattyq sessııalar, jeke keńes berýler ótkiziledi, ıdeıany damytyp, onyń prototıpin jasaıtyn bolamyz. Jazda jobalardy testilep, kompanııalardyń bazasynda iske qosqaly otyrmyz», -dedi Mádıev.
«Garage» baǵdarlamasy aıasynda komandalar óz startabynyń ıdeıasyn testilep, eń kem degende jumysqa jaraıtyn ónimdi (MVP) jasap shyǵarýǵa, alǵashqy klıentterdi tartyp, óz jobalaryn ınvestorlarǵa tanystyrýǵa múmkindik almaq.
Búgin árbir komanda óz bıznes-jobasyn tanystyrady, al keshke olardyń ishindegi úzdikteri «Garage» startap-ınkýbatoryna qatysý úshin tańdalady. Osylaısha isin jańadan bastaǵan kásipkerler tájirıbeli tálimgerlerdiń qol astynda jobany basqarý, ónim jasaý jáne marketıng jóninde tegin bilimdergi ıgerýge múmkindik alady.
Startap-jobalardy tanystyrýmen qatar, jastar arasynda kásipkerlik mádenıetti damytý jáne otandyq bıznesti halyqaralyq naryqqa shyǵarý taqyrybyna arnalǵan eki paneldik sessııa ótti.