Qazaqstandaǵy úzdik aýyl ákimderi anyqtaldy
Úzdik aýyl ákimi bolyp Almaty oblysy Іle aýdanynyń Boraldaı kenti ákimi Danııar Qońyrbaev anyqtaldy, dep habarlaıdy QazAqparat tilshisi.
D. Qońyrbaev daýys berý kezinde eń kóp upaı jınap, 1 júldeli orynǵa ıe boldy jáne óz aımaǵynyń áleýmettik-ekonomıkalyq jaǵdaıyn jaqsartý boıynsha jobasyn sátti qorǵap shyqty.
2-oryndy 2 ákim ıelendi. Olar: Aqmola oblysy Tselınograd aýdany Mánshúk aýyldyq okrýginiń ákimi Ǵanı Isaev jáne Aqtóbe oblysy Muǵaljdar aýdany Taldysaı aýyldyq okrýginiń ákimi Qazbek Aqqaıyr.
3-oryndy da 2 ákim ıelendi: Pavlodar oblysy Aqtoǵaı aýdany Jalaýly aýyldyq okriginiń ákimi Azamat Medetov jáne ShQO Jarma aýdany Shalabaı aýyldyq okriginiń ákimi Janar Esembaeva.
Sondaı-aq, «Úzdik áleýmettik-ekonomıkalyq joba» nomınatsııasy Jambyl oblysy, Rysqulov aýdany Abaı aýyldyq okriginiń ákimi Muratbek Arystambekovke, «Halyqqa ashyq ákim» nomınatsııasy Qaraǵandy oblysy Buqar jyraý aýdany Tsentralnyı aýyldyq okrýginiń ákimi Samat Meırmanovqa, «Úzdik isker-sharýa ákim» nomınatsııasy Atyraý oblysy Isataı aýdany Tuşyqudyq aýyldyq okrýginiń ákimi Mádı Óteǵalıevke tabystaldy.
Respýblıkalyq konkýrstardyń jeńimpazdary men qatysýshylary QR Memlekettik qyzmet isteri agenttigi tóraǵasy Anar Jaılǵanovanyń atynan gramotalarmen, dıplomdarmen jáne alǵys hattarymen marapattaldy.
Konkýrstyń maqsaty eldiń aýyldyq eldi mekenderindegi jergilikti ózin-ózi basqarýdy damytý, jergilikti bastamalardy, onyń ishinde qoǵamdyq ózin-ózi basqarý uıymdaryn yntalandyrý, jumysta joǵary nátıjelerge qol jetkizgen, aýyldyq eldi mekenderdi damytýǵa eleýli úles qosatyn úzdik aýyl ákimderin anyqtaý jáne kótermeleý bolyp tabylady.
Konkýrs eki kezeńnen turdy.
Respýblıkalyq baıqaýdyń birinshi kezeńi oblystyq deńgeıde ótti. Elimizdiń 14 óńirinen kelgen úzdik ákimder respýblıkalyq baıqaýǵa jiberildi.
Konkýrstyń birinshi kezeńinde Agenttiktiń aýmaqtyq departamentteri oblystardyń ákimdikterimen konkýrs ádistemesine sáıkes jumys júrgizdi. Oblystyń Ádep jónindegi ýákilderimen birlesip arnaıy saýalnama ázirlendi, ol boıynsha turǵyndardyń pikiri eskerildi jáne úmitkerlerdiń memlekettik qyzmetshilerdiń etıkasyn saqtaýy boıynsha qorytyndy berildi.
Budan basqa, ákimderdiń halyqpen tıimdi jáne keri baılanysty jolǵa qoıý jónindegi qyzmeti baǵalandy, osy baǵytta qol jetkizilgen nátıjeler zerdelendi.
Memleket basshysy Q.Toqaevtyń «Halyq únine qulaq asatyn memleket» tujyrymdamasyn iske asyrý, ıaǵnı halyqpen keri baılanys ornatý jáne máselelerdi ýaqytyly sheshý maqsatynda aýyl turǵyndary úshin «Ashyq ákimdik», «Ashyq dıalog» formattarynda toqsan saıynǵy kezdesýler ótkizý tájirıbesi engiziledi.
Aýyl turǵyndaryna memlekettik qyzmetterdiń qoljetimdiligin qamtamasyz etý maqsatynda, aýyl ákimdikteriniń kóptegen ǵımarattarynda ózine-ózi qyzmet kórsetý buryshtary ashylǵan.
Aýyl ákiminiń turǵyndarmen ashyq qarym-qatynasy jáne ózekti máseleler boıynsha ýaqytyly sheshim qabyldaý nátıjesinde halyqtyń áleýmettik máseleleri sheshiledi.
Prezıdent óziniń 2019 jylǵy Qazaqstan halqyna Joldaýynda jergilikti bıliktiń turǵyndarǵa qoljetimdi bolýyn atap ótken bolatyn.
Sondaı-aq, «Halyq únine qulaq asatyn memleket» tujyrymdamasy aıasynda baǵalaý rásimderiniń mindetti talaptarynyń biri oblys ákimdikteriniń saıtynda ornalastyrylǵan 16 krıterıı boıynsha onlaın-daýys berý túrinde ótken ákimderdiń jumysyna halyqtyń qanaǵattanýyn ólsheý bolyp tabylady.
Úmitkerler aýyldyq okrýgti damytýǵa, aýyldyq jerlerdiń áleýmettik-ekonomıkalyq problemalaryn sheshýge baǵyttalǵan jobalyq jumys, sondaı-aq «Men nege «úzdik aýyl ákimi» ataǵyna laıyqpyn» taqyrybynda esse daıyndady.
Eń joǵary ball jınaǵan kandıdatpen respýblıkalyq komıssııa jeke onlaın áńgimelesý ótkizdi, onyń quramyna Prezıdent Ákimshiliginiń, QR Memlekettik qyzmet isteri agenttiginiń jáne QR Aýyl sharýashylyǵy mınıstrliginiń qyzmetkerleri, Senat pen Parlament depýtattary, qoǵamdyq uıymdar men BAQ ókilderi kirdi.
Komıssııa músheleri olardyń esselerin, jazýdaǵy kreatıvti tásilderin oń baǵalady, sondaı-aq jeńimpazdardyń jobalyq jumystary basqa qatysýshylardyń jumystarymen salystyrǵanda úzdik boldy.