Qazaqstandaǵy turaqtylyq pen kelisimniń qupııasy nede

ASTANA. QazAqparat - Astanada ótip jatqan halyqaralyq ǵylymı konferentsııada QR Din isteri jáne azamattyq qoǵam mınıstri Nurlan Ermekbaev «Qazaqstandaǵy turaqtylyq pen kelisimniń qupııasy nede?» degen saýalǵa jaýap berdi, dep habarlaıdy QazAqparat.

«Qazaqstanda turaqtylyq pen kelisimniń qupııasy nede? Onyń jaýaby anyq. Táýelsizdiktiń alǵashqy kúnderinen bastap Elbasynyń barlyq bastamalary qazaqstandyqtardyń birligin nyǵaıtý maqsatyna baǵyttaldy. Prezıdent atap kórsetkendeı: «Qazaqstannyń barlyq tarıhy - ol birigý tarıhy. Biz - tek qana birlik pen birigý jolynda kele jatqan halyqpyz». Nursultan Nazarbaevtyń modeli barlyq azamattardyń quqyǵyn qurmetteýge jáne ekstremızmniń kez kelgen kórinisterine, zorlyq-zombylyqqa, radıkalızmge múldem tózbeýshilikke negizdelgen. Sondaı-aq onyń ishinde memleket pen azamattyq ınstıtýttardyń arasynda ashyq dıalog ornatý boıynsha mindetti basymdyqtar qoıylǵan», -  dedi mınıstr.

Onyń aıtýynsha, atalǵan prıntsıpter barlyq strategııalyq baǵdarlamalyq qujattarda, onyń ishinde Elbasynyń jyl saıynǵy Joldaýynda, Qazaqstannyń 2050 jylǵa deıingi damý strategııasynda kórsetilgen. Sonymen qatar, «Bolashaqqa baǵdar: rýhanı jańǵyrý» maqalasynda Prezıdent barlyq etnıkalyq toptar men dinderge tózimdilikpen, beıbitshilikpen jáne qurmetpen qaraý - Qazaqstannyń baıyrǵy murasy ekenin atap ótken.

«Dál osy dástúrlerdiń ózi tabysty damýdyń negizi bolyp tabylady. Osy qundylyqtar negizinde ulttyq biregeılikti Memleket basshysy odan ári jańǵyrtýdyń mańyzdy sharty retinde anyqtaıdy. Biz Táýelsizdiktiń 25  jyldyǵyna oraı Qazaqstan halqy Assambleıasy qorymen birge qoǵamdyq pikirdi keń aýqymda zerdeledik. Bizdiń zertteýimiz kelesini kórsetedi. Qazaqstandyqtardyń kóp bóligi dinge kózqarastardyń erkindik quqyǵyn, etnostardyń múddelerin saqtaýdy qamtamasyz etý jónindegi memleket saıasatyn qoldaıdy», - dep atap ótti Nurlan Ermekbaev.

Aıta keterligi, «Biregeılik pen birlik: Qazaqstan joly jáne N.Á.Nazarbaevtyń úlgisi» atty halyqaralyq ǵylymı-tájirıbelik konferentsııa QR Tuńǵysh Prezıdenti kúnine jáne elordanyń Astanaǵa kóshirilýiniń 20 jyldyǵyna arnalǵan. Shara maqsaty - álem elderindegi biregeıliktiń qalyptasý máselelerin qazaqstandyq tájirıbemen salystyra talqylaý, etnosaralyq jáne konfessııaaralyq  kelisimniń «N.Nazarbaev modeli» retinde tanylǵan qazaqstandyq úlginiń tusaýyn kesý. Konferentsııaǵa saıasattaný, tarıh, fılosofııa, áleýmettaný, etnologııa jáne basqa da gýmanıtarlyq ǵylymdar baǵytyndaǵy Germanııa, Úndistan, Iran, Qazaqstan, Qyrǵyzstan, Reseı, Ózbekstan  elderiniń ǵalymdary qatysýda.