Qazaqstandaǵy turaqtylyq Ortalyq Azııanyń turaqtylyǵyna kepil - Tájikstan sarapshysy

ASTANA. QazAqparat – Tájikstan Respýblıkasynyń Prezıdenti janyndaǵy Strategııalyq zertteýler ortalyǵynyń dırektory Haırıddın Ýsmonzoda Qazaqstanda qolǵa alynǵan reformalardyń sátti iske asýy búkil Ortalyq Azııanyń turaqtylyǵyna oń áser etetinin aıtady, dep habarladıy QazAqparat tilshisi.

«Eger buryn Ortalyq Azııa elderi syrttan alynǵan boljamdarǵa súıense, búginde bul boljamdar aımaqtyń strategııalyq zertteý ortalyqtarynda jasalady. Biz muny birge jasaımyz. Únemi pikir almasyp, burynnan ózimizge málim máselelerge tótep berý úshin onyń joldaryn birlese pysyqtaımyz. Búginde Qazaqstan Respýblıkasy Prezıdentiniń basshylyǵymen eldiń saıası júıesinde júzege asyrylyp jatqan reformalar Ortalyq Azııanyń kóptegen elderi úshin de mańyzdy», - deıdi Tájikstan sarapshysy.

Spıker Qazaqstannyń turaqty damýy búkil Ortalyq Azııanyń turaqtylyǵynyń kepili ispettes ekenin aıtady.

«Tájirıbe kórsetkendeı, Qazaqstan árdaıym senimdi túrde alǵa jyljyp keledi. Onyń turaqtylyǵy men ekonomıkalyq damýy búkil óńirdiń turaqtylyǵy men damýynyń kepili bolyp esepteledi», - dedi ol Astanada ótken «Ortalyq Azııa-2030: bolashaq kelbeti» atty sarapshylar kezdesýinde.

Buǵan deıin Qyrǵyz Respýblıkasynyń Prezıdenti janyndaǵy Ulttyq strategııalyq zertteýler ınstıtýtynyń dırektory Qanatbek Azız Qazaqstanda ótetin kezekten tys Parlament saılaýy týraly pikir bildirgen edi.

Al, Ózbekstan Prezıdenti janyndaǵy Strategııalyq jáne óńiraralyq zertteýler ınstıtýtynyń dırektory Eldor Arıpov Ortalyq Azııa jastarynyń róli týraly aıtty.

Sondaı-aq, QR Prezıdenti janyndaǵy Qazaqstan strategııalyq zertteýler ınstıtýtynyń dırektory Erkin Tuqymov Ortalyq Azııanyń demografııalyq ósimine ekonomıkasynyń ilese almaýy keleshekte kútpegen qıyndyqtar týyndatýy múmkin ekeni týraly pikir bildirdi.

Foto: Arman Mýhatov