Qazaqstandaǵy tuńǵysh JEK aýktsıonyna BAÁ ınvestorlary shaqyryldy

ASTANA. QazAqparat - QR Energetıka mınıstri Qanat Bozymbaev Ábý-Dabı ınvestorlary men qarjy ınstıtýttaryn elimizde ótetin jańartylatyn energııa kózderiniń aýktsıonyna qatysýǵa shaqyrdy, dep habarlaıdy «QazAqparat» HAA tilshisi.

QR Energetıka mınıstrligi baspasóz qyzmetiniń habarlaýynsha, mınıstr bastaǵan qazaqstandyq delegatsııa 13-14 qańtarda Ábý-Dabı qalasynda (Birikken Arab Ámirligi) jańartylatyn energııa kózderi (JEK) jónindegi halyqaralyq agenttiktiń (IRENA - International Renewable Energy Agency) VIII sessııasyna qatysty. Assambleıanyń alǵashqy kúninde Qanat Bozymbaev sóz sóılep, Qazaqstan álemdegi jetekshi kómirsýtegi óndirýshileriniń birinen «jasyl» ekonomıka modeline kóshý úderisinde ekenin atap ótti. Mınıstrdiń sózine qaraǵanda, 2009 jyly qabyldanǵan jańartylatyn energııa kózderin qoldaý tetikteri JEK naryǵyn josparly túrde iske qosýǵa múmkindik bergen.

«Bıyldan bastap tuńǵysh JEK aýktsıondaryn ótkizýdi josparlap otyrmyz. Osy múmkindikti paıdalanyp, ınvestorlarǵa, qorlarǵa jáne qarjy ınstıtýttaryna Qazaqstandaǵy jańartylatyn energııa aýktsıondaryna qatysýǵa shaqyramyn. QR Energetıka mınıstrligi aýktsıon jeńimpazdaryn irikteý úshin beıtarap protsedýrany qamtamasyz etedi, jeńimpazdarǵa PPA kelisimshartyn jasasyp, jobany iske asyrýdyń barlyq kezeńderinde de jan-jaqty qoldaý kórsetetin bolady» - dedi mınıstr.

Sondaı-aq Assambleıa sessııasy aıasynda Ońtústik Qazaqstan oblysynyń Arys qalasynda kún elektr stantsııasyn (14 MVt) salý boıynsha «Zadarııa» jobasyn qoldaý úshin QR EM, Eýropalyq qaıta qurý jáne damý banki men frantsýzdyq «URBASOLAR» arasynda kelisimge qol qoıyldy.