Qazaqstandaǵy tuńǵysh partııaishilik saılaý qalaı ótti – qatysýshylar pikiri
Almaty qalasy fızıka-matematıka baǵytyndaǵy Nazarbaev zııatkerlik mektebiniń dırektory Juldyz Súleımenova Medeý aýdany boıynsha praımerızge qatysqan.
«Aldyn ala qorytyndyǵa sáıkes, 4980 adamnyń 2639-y maǵan daýys berdi. Senim bildirip, qoldaý tanytqandaryńyz úshin kóp rahmet aıtamyn! Orta bilim salasynyń kásibı mamany, Almaty qalasynyń 61 orta bilim berý uıymyna jańartylǵan bilim mazmunyn taratýdy negizgi uıymdastyrýshy retinde men úshin sapaly bilimge qojetimdilikti qalyptastyrý negizgi basym mindet bolyp qala beredi. Budan bólek, jastardyń azamattyq pozıtsııasyn damytýǵa qatysty jobalardyń avtory ári óskeleń urpaqqa tárbıe berý metodology retinde jastar men qazaqstandyq otbasy máseleleri de únemi nazarymda», - dep jazdy J. Súleımenova áleýmettik jelide.
Sonymen birge, Aıagóz qalasyndaǵy №6 jalǵy bilim beretin mektep-ınternattyń dırektory, 991 daýys jınaǵan Lázzat Moldasheva praımerızdiń yńǵaıly ári ashyq uıymdastyrylǵanyn jetkizdi.
«Ustazdar merekesine taǵy bir syılyq. Praımerızge qatysý múmkindigi úshin «Nur Otan» partııasyna jeke alǵysymdy bildiremin. Bul tarıhı shara elimizde alǵash ret bolyp otyr. Barlyǵy barynsha yńǵaıly jáne ashyq túrde uıymdastyryldy. Úlken jumys atqaryldy. «Nur Otan» partııasy adal ári ashyq ishki partııalyq saılaý ótkizýge ymyrasyz nıetti. Aýdanymyzda men úshin 991 adam daýys berdi. Bul men úshin úlken mártebe. Meniń durys jolda ekendigimniń dáleli. Maǵan senim artqan barlyq partııa múshelerine úshin alǵys bildiremin!», - deıdi L. Moldasheva.
Almaty qalasy Áýezov aýdanynyń úmitkeri M.O.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov turǵyndardyń 70 paıyzy daýys berýge qatysyp, belsendilik tanytqanyn atap ótti.
«Men, Almaty qalasy Áýezov aýdanymen óte tyǵyz qarym-qatynastamyn. Osy aýdanda on jyldan artyq turdym. Osy aýdannan qalalyq máslıhatqa depýtat bolyp saı̆lanyp, bes jyldaı̆ turǵyndarmen birge jumys istep kelemin. Áýezov aýdanynyń partııa fılıaly qaladaǵy eń úlken ujym bolyp sanalady. Quramynda toǵyz myńnan astam múshesi bar. Uly jazýshy atyndaǵy aýdan turǵyndary Praı̆merız kezinde de uı̆ymshyldyq tanyta bildi. «Nur Otan» partııasy Áýezov aýdandyq fılıalynyń jetpis paı̆yzǵa jýyǵy daýys berip, belsendilik tanytty. Daýys bergen partııalas áriptesterdiń jetpis bes paı̆yzyna jýyǵy meniń baǵdarlamamdy unatypty. Bul men úshin úlken qoldaý, qaltqysyz senim jáne júktelgen jaýapkershilik. Amanattaryńyzǵa adal bolýǵa bar kúsh-jigerimdi aıamaı̆myn, ardaqty áýezovtikter. «Ulttyń jańa bolmysyn» birge qalyptastyraı̆yq!», - deıdi Q. Matyjanov.
Sondaı-aq, almatylyq dáriger, №5 klınıkalyq aýrýhana basshysy Bolat Sadyqov Almaty qalasynyń Medeý aýdanynan saılaýǵa qatysqan.
«Bizdiń elimizdiń tarıhynda tuńǵysh ret keń aýqymdy partııaishilik saılaý ótkizilýde. Praımerız - bul halyqaralyq saılaý úderisindegi eń demokratııalyq ári ashyq is-sharalardyń biri. Praımerız damyǵan elderdiń saılaý júıesinde keńinen qoldanylady. Praımerız aıasynda bizdiń otandastarymyz óz usynystary men bastamalaryn aıtýǵa, ár aımaqtyń, aýdannyń jáne eldimekenniń máselelerin kóterýge jáne keńinen talqylaýǵa múmkindik aldy. Nurotandyqtar praımerız aıasynda uıymdastyrylǵan kezdesýler men is-sharalarǵa belsendi túrde qatysty. Barlyq is-sharalar týraly málimetter áleýmettik jeliler arqyly jarııalandy. Partııaishilik saılaý aıasynda men qoǵamnyń ártúrli salasyndaǵy azamattarmen jáne áleýmettik toptardyń múshelerimen kezdestim, Medeý aýdanyndaǵy kásiporyndardyń eńbek ujymdaryndaǵy bastaýysh partııa uıymdarynyń múshelerimen kóptegen onlaın kezdesýler ótkizdim. Biz partııalastarymyzben birge syndarly usynystar men ózekti máselelerdi talqyladyq. Osy jumystar barysynda qoldaý kórsetken partııa múshelerine zor alǵys aıtqym keledi », - deıdi Bolat Sadyqov.