Qazaqstandaǵy TKSh jańǵyrtý baǵdarlamasy júzege aspady - T. Raqymbekov
«Baǵdarlama iske aspady. Ol eshbir ındıkator boıynsha mejeli jerine jetpedi. Jalpy baǵdarlamalardy qabyldaýdyń ózi bizdiń elde keri ketip barady. Olar kóbine ınvestıtsııalyq jobalar jıyndyǵyna aınaldy, shyn máninde olar qandaı da bir salanyń belgili bir máselesin sheshýdegi joldar men tetikterdiń jıyntyǵy bolýy kerek edi. Baǵdarlamalardy qandaı da bir mańyzdy máselesi bar salaǵa arnap qabyldaý qajet» - dedi ol.
Onyń aıtýynsha, ınvestıtsııalyq jobalar baǵdarlamalardyń shyǵynyn jaba almaıdy.
«Bıýdjet qarajaty jetispeýde. Bizdiń sanaýymyz boıynsha jyl saıyn elimiz boıynsha jóndeý jumystaryna 100-den 300 mlrd. teńge qajet eken. Taǵy 100 mlrd. paıdaǵa berý jumystaryna ketedi. Bıýdjetimizde osynsha qarajat bar ma? Bar bolýy neǵaıbyl. Degenmen men bul jerde osynyń barlyǵyn menshik ıeleriniń ıyǵyna artý kerek dep turǵan joqpyn. Memleket týraly da sóz basqa. Túrli ınvestıtsııalyq jobalarǵa shashqan aqshany shyn zárý adamdarǵa berý kerek», - dep atap ótti ol.
Onyń málimetinshe, TKSh jańǵyrtý baǵdarlamasy boıynsha jyl saıyn 26 mlrd. teńge bólinedi, al óńirlerdi damytý baǵdarlamasy boıynsha 10 mlrd. teńge qarastyrylǵan.
«Másele tipti osy aqshada da emes, másele solardy qalaı tıimdi paıdalanýda. 26 mlrd. eshqaıda jetpeıdi, jylyna kem degende 200 mlrd. qajet. Bul jerde túrli tetikter qajet. Eger banktiń nesıelik paıyzy 15 paıyz bolsa, memleket tarapynan sýbsıdııalaý arqyly ony nege 4 paıyzǵa deıin túsirmeske? Ekinshiden, qarajatty tolyqtaı tóleý kimniń qolynan keledi? Meniń oıymsha turǵyndardyń teń jartysy tóleý múmkindigine ıe. Al tóleı almaıtyndarǵa turǵyn úı kómegi shoty arqyly jergilikti bıýdjet qolushyn berý qajet», - dedi tóraǵa.