Qazaqstandaǵy taǵaıyndaýlar: Baıshaqov otandyq fýtboldy damyta ala ma
Shyny kerek, sońǵy kezderi otandyq fýtbolda «legıonerler men olardyń jalaqylary» degen máselege ákimshilik teketirester de qosylyp, osy salada júrgen fýnktsıonerlerdi ábden sharshatty. Federatsııanyń burynǵy basshysy Erlan Qojaǵapanovtyń kelýimen biraz sharalar jasalady degen jospar bolǵan edi. Alaıda onyń arty suıylyp, ishki daý-damaılarǵa ulasty. Sodan Qazaqstannyń kásibı fýtboly lıgasynyń basshylyǵy qyzmetinen ketti. Al klýbtar óz ishinde ekige bólindi. Artynan bári tynyshtalǵandaı boldy. Biraq «Aqtóbe» klýbynyń bas bapkeri, reseılik maman Vasılev myrza jemqorlyq úshin ustaldy» degen shuǵyl aqparat fýtbol jankúıerlerdi «tóbeden jaı túskendeı» áserde qaldyrdy, taǵy kóptegen boljamdar men paıymdaýlar jasaldy. E.Qojaǵapanovtyń ózi bolsa, shetelde bilim alamyn dep, óz qyzmetinen ketti. Alaıda qaı ýnıversıtette oqyp, qandaı mamandyq boıynsha bilim alatynyn tis jaryp, aıtqan joq. Meıli, osymen otandyq fýtboldy «dúr silkindirgen» kezeń ótti dep senemiz. Sebebi federatsııa basshylyǵyna menedjer emes, naǵyz sportshy, Qazaqstannyń úzdik fýtbolshysy kelip otyr.
Seıilda Baıshaqov sporttaǵy ýaqyttyń basym bóligin «Qaırat» komandasynda ótkizdi. 300-ge tarta matchqa qatysqan ol qazaqstandyq fýtboldyń maqtanyshy bolyp sanalady. Baıshaqov «Qaıratqa» Aleksandr Sevıdovtyń shaqyrýymen kelgen bolatyn. 1971 jyly lenıngradtyq «Zınıtpen» oıynda negizgi quramda shyqty. Kóp jyldar boıy ol komandanyń kapıtany jáne kóshbasshysy boldy. 1981 jyly sporttyq mansabyn aıaqtaǵannan keıin «Qaırattyń» bas bapkeriniń kómekshisi qyzmetin atqardy. S.Baıshaqov - «Qazaqstannyń úzdik fýtbolshysy» degen mártebege ıe bolǵan sportshy. 2007 jyldan beri ol Qazaqstan fýtbol federatsııasynyń vıtse-prezıdenti qyzmetin atqaryp kelgen.
«Bildirgen senimderińizge, qurmetterińizge úlken alǵysymdy aıtamyn. Senimderińizdi joǵary baǵalaımyn. Óz tarapymnan qazaqstandyq fýtboldy damytý úshin barlyq kúsh-jigerimdi salamyn. Alǵa qoıylǵan mindetterdi laıyqty oryndap, bıik maqsattarǵa jetip, jańa shyńdardy baǵyndyrý úshin fýtboldy sapalyq jańa deńgeıge kóteretinimizge senimdimin», - dep atap kórsetti Seıilda Baıshaqov federatsııanyń XIV kezekten tys saılaý konferentsııasynda. Árıne, bul qyzmette oǵan mendjerlik óner de qajet bolady. Alaıda otandyq fýtbolǵa degen janashyrlyǵy arqasynda federatsııanyń basshysy Qazaqstannyń teńbil dobyn bıikke áýelete alady degen senim bar.
Al memlekettik apparattaǵy taǵaıyndaýlarǵa keler bolsaq, aǵymdaǵy aptada eki aýys-túıisti atap ótýge bolady. QR Qorǵanys jáne aeroǵarysh ónerkásibi mınıstrligi Aeroǵarysh komıtetiniń tóraǵasy qyzmetine Erkin Shaımaǵambetov taǵaıyndalsa, QR Memlekettik qyzmetker isteri jáne sybaılas jemqorlyqqa qarsy is-qımyl agenttigi tóraǵasynyń buıryǵymen Soltústik Qazaqstan boıynsha agenttiktiń Jemqorlyqpen kúres ulttyq bıýro departamentiniń basshysy mindetin ýaqytsha atqarýshy bolyp Nyǵmedjan Saparov bekitildi.