Qazaqstandaǵy sý kanaldaryn jóndeýge 221 mlrd teńge bólinedi – mınıstrlik
Bul týraly QR Ekologııa, geologııa jáne tabıǵı resýrstar mınıstrligi Sý resýrstary komıteti tóraǵasynyń orynbasary Dosbol Bekmaǵambetov aıtty, dep habarlaıdy QazAqparat tilshisi.
Qazirgi ýaqytta sý sharýashylyǵynyń problemalyq máseleleri «Jasyl Qazaqstan», «Qýatty óńirler – el damýynyń draıveri» jáne «Agroónerkásiptik keshendi 2025 jylǵa deıin damytý boıynsha» ulttyq jobalar sheńberinde sheshilip jatyr.
«Búgingi kúni sýarý júıesinde uzyndyǵy 21,5 myń km bolatyn shamamen 3,5 myń magıstraldyq jáne sharýashylyqaralyq kanal bar, olardyń 55%-ynyń (11,8 myń km) jaǵdaıy qanaǵattanarlyq emes. Bul sońǵy tutynýshylarǵa sýdy tasymaldaý kezinde shyǵynnyń kóp bolýyna yqpal etedi», - dedi D. Bekmaǵambetov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, kanaldardy qaıta jańartý jumystary turaqty júrip jatyr. Máselen, 2019-2020 jyldary 1734 km kanal jóndelip, 111,5 myń gektar sýarmaly jer aınalymǵa engen. 2021 jyly 78 myń gektar sýarmaly jerdi aınalymǵa engizý úshin 1050 km kanal qaıta jańǵyrtylǵan.
«Bes jylda jalpy somasy 221 mlrd teńgege 8 oblystaǵy 120 kanal qaıta jańǵyrtylady, onyń ishinde respýblıkalyq bıýdjetten 188 mlrd teńge jáne bıýdjetten tys 34 mlrd teńge bólinedi. Búgingi kúni Atyraý oblysy boıynsha 5 jáne Túrkistan oblysy boıynsha 14 jobalyq smetalyq qujat daıyn. 2022-2024 jyldarǵa arnalǵan respýblıkalyq bıýdjetten 4.53 mlrd teńgege 4 kanalǵa (Naıman, Qurtaı, Qazynashylyq jáne R-6) qarajat kózdelgen, onyń ishinde 2022 jylǵa 856 mln teńge, 2023 jylǵa – 2,261 mlrd teńge, 2024 jylǵa – 1,414 mlrd teńge», - dep túsindirdi komıtet ókili.
Jalpy alǵanda, 120 kanaldy qaıta jańartý 2025 jylǵa qaraı sýarmaly alqapty 2,2 mln gektarǵa deıin jetkizýge jáne jyl saıyn 800 mln m3 sýarmaly sýdyń shyǵynyn azaıtýǵa múmkindik beredi. Sonymen birge, bul sharalar aýylda 120 myń jumys ornyn qurýǵa jáne jyl saıyn 510 mlrd teńge ónim ósirýge yqpal etedi.
Buǵan deıin Dosbol Bekmaǵambetov Qazaqstanda 2030 jylǵa qaraı sý resýrstarynyń tapshylyǵy 23,2 tekshe kılometrge jetýi múmkin ekenin aıtqan edi.
Eldiń shyǵys óńiri sý resýrstarymen anaǵurlym kóbirek qamtamasyz etilse, ortalyq Qazaqstan eń az qamtylǵan. Ońtústik jáne Batys óńirler shekaralas elderge táýeldi bolyp otyr.