Qazaqstandaǵy statıstıkalyq derekter shyndyqqa qanshalyqty sáıkes keledi
Aıta ketsek, búgin Parlament Senatynyń ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń Memlekettik statıstıka týraly zańnama qujattaryna ózgerister men tolyqtyrýlar engizý týraly» zań jobasy talqylandy. Zań jobasyn qorǵaǵan Nurbolat Aıdapkelovtiń aıtýynsha, jańa zań jobasy birqatar mindetterdi sheshýge baǵyttalǵan. Atap aıtqanda, zań jobasy boıynsha arqyly memlekettik statıstıka salasyndaǵy quqyqty retteýdi jetildirý, memlekettik statıstıka organdary qyzmetiniń ashyqtyq deńgeıin arttyrý, jınalatyn derekterdiń sapasyn arttyrý jáne resmı statıstıka aqparatynyń sapasyn qamtamasyz etý, respondenttermen jáne paıdalanýshylarmen keri baılanysty qamtamasyz etý, qaıtalanatyn kórsetkishterdi jınaý sekildi jumystardy retteý qarastyrylǵan.
Zań jobasyn talqylaý barysynda senatorlar elimizdegi statıstıkalyq derekteriniń shyndyqqa qanshalyqty sáıkes keletinine qatysty suraq qoıdy. Komıtet tóraǵasy atap ótkendeı, bul máselege qatysty da saýalnama júrgizilgen.
«Biz túrli saýalnama júrgizemiz. Oǵan senbeýlerińiz múmkin, biraq saýal jasaǵan adamdardyń 88 paıyzy statıstıkalyq derekterge senip otyr. 88 paıyzdy - biz úshin joǵary kórsetkish dep esepteımiz. Degenmen, tsıfrlyq deńgeıde qanshalyqty dál nemese dál emes ekenin men naqtylap aıta almaımyn. Jalpy alǵanda, bizdiń barlyq ádistemelerimiz standarttarǵa sáıkes jazylǵan. Derekterdi jınaý tártibiniń bári naqty jasalǵan. Mamandarymyz bar. Osy ýaqytqa deıin kúmán týdyrarlyqtaı qatty jaǵdaılar bolǵan emes. Biraq, jasyratyny joq. Ásirese, aýyl sharýashylyǵy salasyndaǵy statıstıka boıynsha sıgnaldar bolyp turady (...) Biraq, ol derekterdi qolmen ustamaǵannan keıin biz dáleldeı almaımyz», - deıdi Nurbolat Aıdapkelov.
Komıtet tóraǵasynyń aıtýynsha, búkil álemdegi statıstıka respondenttiń óz erkimen jazylǵan, móri basylǵan, qoly qoıylǵan esebine súıenedi.
«Sondyqtan, naqty qatelik nemese aýytqý bar dep aıtý qıyn», - deıdi ol.