Qazaqstandaǵy sheteldik uıymdar teńgemen esep aıyrysady - Aqyshev

ASTANA. QazAqparat - Sheteldik uıym fılıaldarynyń qazaqstandyq kontragenttermen esep aıyrysýlaryn teńgege aýystyrý usynylady. Bul týraly búgin Úkimettiń selektorlyq rejımdegi otyrysynda QR Ulttyq banki tóraǵasy Danıar Aqyshev málim etti, dep habarlaıdy QazAqparat.

«Qazirgi ýaqytta qoldanystaǵy valıýtalyq zańnama boıynsha sheteldik uıymdardyń fılıaldary beırezıdentter bolyp tabylady jáne tıisinshe, olardyń rezıdenttermen valıýtalyq operatsııalardy júzege asyrýǵa quqyǵy bar.   Máselen, 2016 jyly sheteldik uıymdar fılıaldarynyń Qazaqstan rezıdentterimen shetel valıýtasyndaǵy operatsııalarynyń kólemi 2,5 mlrd AQSh dollar qurady»,-  dedi ol «Valıýtalyq retteý jáne valıýtalyq baqylaý týraly» zańnamany jetildirý máselesi jóninde jasaǵan baıandamasynda.

Onyń aıtýynsha, Qazaqstan Dúnıejúzilik saýda uıymyna kirgennen keıin sheteldik fılıaldar men ókildikter sanynyń odan ári ulǵaıýy kútilýde. Bul el ishindegi shetel valıýtasyndaǵy tólemderdiń ósýine ákeledi, ári ulttyq múddelerge sáıkes kelmeıdi.

«Osyǵan baılanysty sheteldik uıymdar fılıaldarynyń qazaqstandyq kontragenttermen esep aıyrysýlaryn teńgege aýystyrý usynyldy. Ózgerister memlekettiń atynan sheteldik uıymdarmen jasalǵan kelisimder arqyly beırezıdent mártebesine kepildik berilgen kompanııalarǵa qatysty bolmaıdy. Bul rette osy zań qoldanysqa engizilgenge deıin jasalǵan sharttarǵa qatysty jaǵdaılarǵa keri áserin tıgizbeıdi», - dedi Danııar Aqyshev.