Qazaqstandaǵy saılaýǵa daıyndyq iskerlik jaǵdaıda ótýde - Latvııa OSK tóraǵasy

ASTANA. QazAqparat - Qazaqstandaǵy saılaýǵa daıyndyq jumystary iskerlik jaǵdaıda ótýde. Búgin QR Ortalyq saılaý komıssııasynyń tóraǵasy Qýandyq Turǵanqulovpen kezdesken Latvııa Ortalyq saılaý komıssııasynyń tóraǵasy Arnıs Tsımdars osyndaı pikir bildirdi.

Kezdesýde Q.Turǵanqulov latvııalyq áriptesterin Qazaqstan Respýblıkasy Parlamenti Májilisiniń depýtattaryn jáne máslıhattarynyń depýtattaryn saılaýdy ázirleý men ótkizý jónindegi jumyspen tanystyrdy.

Talqylaý barysynda kezdesýge qatysýshylar saılaý naýqanynyń partııalyq tizimderdi usynýǵa jáne tirkeýge, saılaýaldy úgitti júrgizý sharttaryna, daýys berýdi uıymdastyrý, daýystardy sanaý jáne saılaýdy qorytyndylaý tártibine qatysty jekelegen sátterine, sondaı-aq Qazaqstan halqy Assambleıasynan 9 depýtatty saılaý erekshelikterine toqtaldy.

A.Tsımdars shaqyrýǵa jáne saılaý naýqanynyń barysyna tolyq sholý úshin alǵysyn bildirip, óz tarapynan baıqaýshylar ókilettikterin ádil jáne alalamaı júzege asyratyndaryn atap ótti. «Bizdiń kózqarasymyzsha, saılaýǵa daıyndyq tynysh jáne iskerlik jaǵdaıda ótýde», - dedi ol.

Kezdesý sońynda Q.Turǵanqulov Tsımdarsqa qazaqstandyq saılaýǵa tanytqan shynaıy qyzyǵýshylyǵyna jáne saılaý protsesin odan ári jetildirý salasynda pikir jáne tájirıbe almasý múmkindigine rızashylyǵyn bildirdi.