Qazaqstandaǵy salyq jeńildikterine ekonomıkalyq baǵalaý júrgizý kerek - sarapshy
«EDYU elderinde tabıǵı monopolııalar degen uǵym joq. Damyǵan elderdiń zańnamasynda mundaı uǵym joq, tek retteletin naryqtar bar. Al Qazaqstanda monopolııalar uǵymy áli sovettik standarttar boıynsha retteledi. Munyń barlyǵyna bıznes pen sheneýnikter resýrs jumsaıdy. Barlyǵy saraptaýǵa kelmeıtin tonnalaǵan qaǵaz toltyrady. Memlekettik organdarda ekonomıkalyq saraptama uǵymy joq. Al damyǵan elderde sotta da ekonomıkalyq saraptama qabyldanady. Mundaı zamanaýı tásilderdi engizýdi sheneýnikterdiń ózderi qunttamaı otyr. Monopolııaǵa qarsy komıtet júrgizgen taldaýlardyń barlyǵy baǵa tym joǵary, alypsatarlardy joıý kerek degenge saıady. Bulaı bolmaıdy, bárin naryqtyń ózi retteýi kerek. Eń bastysy - báseke bolýy kerek», - dedi Janat Ertilesova Prezıdenttiń Qazaqstan halqyna Joldaýynyń alǵashqy nátıjeleri týraly ǵylymı-praktıkalyq konferentsııada.
Sonymen birge, sarapshy salyqtyq saıasat pen ákimshiliktendirý salasyna da toqtaldy.
«EDYU elderinde JІÓ-ge salyqtyq túsimder úlesi Qazaqstanmen salystyrǵanda eki ese kóp. Bul bizde salyq quny tómen degen sóz emes, bizde kóleńkeli sektordyń úlesi kóp. Bári salyqshylardy jazǵyrady. Prezıdent Joldaýynda salyq boıynsha jaqsy baǵyttar bar. Solardyń bári túpki nátıjege deıin atqarylsa jaqsy bolatyn edi. Bul salyq deklaratsııasy men ózin-ózi jumyspen qamtyǵandarǵa qatysty. Elimizde salyq jeńildikterine ekonomıkalyq baǵalaý júrgizilmedi. Al búkil salyq kodeksi - jeńildikter. Menińshe, olardyń tıimdiligin baǵalaý qajet», - dedi spıker.
Úshinshiden, shaǵyn jáne orta bıznesti aıtqanda, únemi shaǵyn bızneske kóp kóńil bólinetinin aıtty.
«Orta bıznes - elimizdiń turaqty damýynyń negizi. Bul eń ózgermeli bıznes. Biraq, Salyq kodeksinde de, Bıznestiń jol kartasynda da orta bızneske jeńildik qarastyrylmaǵan. Statıstıka boıynsha, elimizde orta bıznes sýbektileri azaıyp keledi», - dedi Janat Ertilesova.
Aıta keteıik, elordada Prezıdent Qasym-Jomart Toqaevtyń Qazaqstan halqyna Joldaýynyń alǵashqy nátıjeleri talqylandy. Oǵan memlekettik organdardyń, Qazaqstannyń ǵylymı-saraptamalyq qaýymdastyǵynyń 80-nen astam ókili qatysty.