Qazaqstandaǵy reseılik enshiles bankterdiń shottaryndaǵy 9,2 mlrd teńge buǵattalǵan

NUR-SULTAN. QazAqparat – Qazaqstandaǵy reseılik enshiles bankterdiń shottaryndaǵy shamamen 9,2 mlrd teńge buǵattalǵan. Bul týraly Májilis depýtattarynyń saýalyna QR Qarjy naryǵyn retteý jáne damytý agenttiginiń tóraǵasy Mádına Ábilqasovanyń jaýabynda aıtylǵan, dep habarlaıdy QazAqparat tilshisi.

«Sanktsııalyq talaptar aıasynda jekelegen sheteldik bankter «Sberbank» AQ EB-niń, «Alfa-Bank» AQ EB-niń jáne «Bank VTB (Qazaqstan)» AQ EU-nyń shetel valıýtasyndaǵy korrespondenttik shottaryn buǵattaǵan. Osynyń nátıjesinde bankterdiń málimetteri boıynsha, atalǵan bankterdiń shottaryndaǵy jalpy somasy shamamen 9,2 mlrd teńge («Sberbank» AQ EB boıynsha – 2,7 mlrd teńge, «Alfa-Bank» AQ ,EB boıynsha – 6,2 mlrd teńge, «Bank VTB (Qazaqstan)» AQ EU boıynsha – 0,3 mlrd teńge) bolatyn qaldyqtar buǵattaldy», - dep atap ótedi agenttik tóraǵasy jaýabynda.

Onyń dereginshe, budan basqa sheteldik bankter «Sberbank» AQ EB-niń jekelegen klıentteri boıynsha 2,9 mlrd teńge somadaǵy shetel valıýtasyndaǵy tólemderdi buǵattaǵan.

«Alfa-Bank» AQ EB klıentteri boıynsha jekelegen klıentter boıynsha 3,9 mlrd teńge somasyndaǵy shetel valıýtasyndaǵy tólemder men aýdarymdar buǵattaldy. Qazirgi ýaqytta banktiń jańa aktsıoneri «Bank TsentrKredıt» AQ bankti AQSh pen birqatar basqa elderdiń sanktsııalyq tiziminen shyǵarý jumystaryn júrgizýde. «Bank VTB (Qazaqstan)» AQ EU-nyń klıentteri boıynsha olardyń tólem jáne aýdarym operatsııalary aıasynda qarajattardy oqshaýlaý nemese buǵattaý faktileri joq», - delingen Mádına Ábilqasymovanyń jaýabynda.