Qazaqstandaǵy reformalar ýaqtyly jasalyp jatyr - Prezıdent
«Táýelsizdiktiń alǵashqy jyldarynda saılanǵan birinshi Parlamentimiz kommýnıstik boldy, ıaǵnı Keńes Odaǵy kezinde qalyptasqan. Olardyń barlyǵynyń oı-sanasy burynǵy júıemenen ósken. Qazirgini bilmediń dep ony kinálaýǵa da bolmaıdy. Burynǵyny qoıyp, endi myna naryqqa kóshý kerek boldy. Al naryqtyq jaǵdaı múldem basqa. Parlamentimiz zań qabyldaýy kerek boldy, alaıda qabyldamaıdy, túsinbedi. Men kelip, árbir zańdy qabyldaý úshin sol Parlamenttiń ishinde otyrdym. Zań jobasynyń árbir babyn túsindirdim(...) Ózderińiz bilesizder, sol kezde Parlamentti taratýǵa týra keldi, sodan keıin barlyq ókilettikti de, jaýapkershilikti de Prezıdent ózine alýǵa týraly keldi. Sol kezde 147 zańdy kúshi bar Jarlyqqa qol qoıdym», - dep eske aldy Prezıdent.
Osy oraıda Elbasy atalǵan qadamdardyń arqasynda elimiz TMD-nyń ózge memleketteriniń aldyna túsýge qaýqarly bolǵanyn atap ótti. Bul turǵyda naryqtyq ekonomıkaǵa qajetti jer qoınaýy, bıznes, jekeshelendirý, ınvestıtsııa jáne ózge mańyzdy máseleler boıynsha tıisti sheshim jasaýǵa múmkin boldy.
«Barlyq qabyldanǵan baǵdarlamalar oryndalýy úshin, qarjymen qamtamasyz etilýi úshin qatańdyq tanytýǵa týra keldi. Osy rette nátıjelerge qol jetkize aldyq. Ekonomıkamyzdy 21 esege arttyrdyq, elimizdegi kedeıshilikti 12 esege azaıttyq, 90-shy jyldarmen salystyrǵanda eńbekaqy 25 esege joǵarylady. Buǵan deıin Qazaqstan qandaı bolǵanyn jáne qazirgi kezde qalaı ekenin salystyryp kórińizder», - dedi Memleket basshysy.
N. Nazarbaevtyń paıymynsha, endi qazirgi kezde bir adamǵa shoǵyrlandyrmaı, ókilettikterdi bólý ýaqyty jetti. Bul baǵytta ókilettikter bılik tarmaqtary arasynda qaıta bólingendigi durys qadam.
«Sondyqtan barlyǵy ýaqytymen jaǵdaıǵa baılanysty alǵa jyljyp kele jatyr dep sanaý kerek», - dep túıindedi sózin Prezıdent.