Qazaqstandaǵy prezıdent saılaýyna 1 myńnan astam sheteldik baıqaýshy keledi - QR OSK

NUR-SULTAN. QazAqparat - QR Ortalyq saılaý komıssııasy aǵymdaǵy jyldyń 9 maýsymynda ótetin kezekten tys prezıdent saılaýyna 1 myńnan astam sheteldik baıqaýshynyń keletindigin boljap otyr, dep habarlaıdy QazAqparat tilshisi.

«Qazirgi ýaqytta qansha halyqaralyq baıqaýshy bolatyndyǵyn tek qana boljaı alamyz. Ol aldaǵy ýaqytta belgili bolady. Máselen ótken saılaýlarda 1 024-ten bastap 1633-ke deıin baıqaýshy tirkelgen. Osy jolǵy saılaýda da osy mólsherde, bir myńnan astam halyqaralyq baıqaýshy bolady dep oılaımyz» - dedi OSK múshesi Záýresh Bımoldına búgin atalǵan komıssııanyń otyrysynan keıingi baspasóz máslıhatynda.

Osy rette OSK tóraǵasy Berik Imashev 2015 jyly ótken prezıdent saılaýynda qandaı halyqaralyq uıymdardan qansha baıqaýshy kelgendigin aıtyp berdi.

«EQYU DIAQB mıssııasynan - 291, TMD baıqaýshylary mıssııasynan - 410, ShYU mıssııasynan 10 jáne basqa da uıymdardan 99 baıqaýshy keldi. Munan bólek elimizdiń Syrtqy ister mınıstrliginde akkredıttelgen BAQ boldy. Olar - 168 adam», - dep naqtylady Berik Imashev.

Al OSK múshesi Baqyt Meldeshov jaqyn kúnderi elimizdiń Syrtqy ister mınıstrligine sheteldik baıqaýshylardy akkredıtteý týraly arnaıy hat jiberiletindigin atap ótti.