Qazaqstandaǵy ózge ult ókilderiniń úlesi qandaı

NUR-SULTAN. QazAqparat – Aqparat jáne qoǵamdyq damý mınıstrligi Qazaqstan halqy Assambleıasynyń 2026 jylǵa deıingi damý tujyrymdamasyn jarııalady, dep habarlaıdy QazAqparat tilshisi.

Mınıstrlik usynǵan qujatta jyl basyndaǵy derekter boıynsha Qazaqstan halqynyń sany 19 mln 122 myń adamdy quraǵan. Onyń basym bóligi, ıaǵnı 69 paıyzdan astamy qazaq ultynyń ókilderi.

«2022 jylǵy 1 qańtardaǵy jaǵdaı boıynsha elimizdegi eń kóp ult ókili - qazaqtar. Qazaqtar (69,03%), orystar (18,47%), ózbekter (3,29 %), uıǵyrlar (1,5%), ýkraındar (1,3%), tatarlar (1,06%), nemister (0,92%), túrikter (0,61%), kárister (0,57%), ázerbaıjandar (0,61%), dúngender (0,40%), belorýstar (0,28%), tájikter (0,27%), kúrdter (0,25%), sheshender (0,18 %), polıaktar (0,15 %), bashqurttar (0,09 %), basqa etnos ókilderi 1,04 %-dy qurady», - delingen damý jospary baıandalǵan qujatta.

Vedomstvo málimetinshe, 2018-2021 jyldar aralyǵynda birshama demografııalyq ósim baıqalǵan. Atap aıtqanda, sońǵy úsh jylda eldegi halyqtyń sany 2,6 %-ǵa artty.