Qazaqstandaǵy Ózbekstan Elshisi Shavkat Mırzıeevtiń joldaýyn túsindirdi
«Bul Prezıdenttiń úshinshi joldaýy. Ol ótken jyldy qorytyndylap, 2020 jylǵy jáne aldaǵy 5 jyldaǵy el damýynyń basymdyqtyq baǵyttary men mindetterin aıqyndady. Sonymen qatar ózekti máseleler boıynsha zańnamalyq bastamalar jasady», - dedi Saıdıkram Nııazhodjaev .
Onyń atap ótýinshe, 2019 jyldyń jeltoqsanynda Ózbekstanda «Jańa Ózbekstan - jańa saılaý» degen uranmen saılaý ótip, ol jańa saıası ahýaldy qalyptastyrdy. Halyqaralyq standarttar negizinde ashyq ári jarııa túrde ótken saılaýǵa 50-ge jýyq el men 10 halyqaralyq uıymnan 825 baıqaýshy qatysty. Ózbekstan alǵash ret Eýropadaǵy qaýipsizdik jáne yntymaqtastyq uıymynyń Demokratııalyq uıymdar jáne adam quqyǵy bıýrosynyń tolyqqandy shtabymen tyǵyz yntymaqtastyqta boldy. Atalǵan bıýrodan saılaýǵa 316 baıqaýshy keldi.
S. Nııazhodjaevtiń sózine qaraǵanda, Ózbekstan Prezıdenti Sh. Mırzıeev 2019 jyldy qorytyndylaı kele ınvestıtsııalyq aǵyn kóleminiń birshama óskenin aıtqan. Tikeleı shetel ınvestıtsııasy 4,2 mlrd dollardy quraǵan. Bul 2018 jylmen salystyrǵanda 3,1 mlrd dollarǵa nemese 3,7 esege kóp. Ózbekstannyń jalpy ishki ónimindegi ınvestıtsııa kólemi 37 paıyzǵa jetip otyr. El alǵash ret halyqaralyq kredıt reıtıngine ıe bolyp, halyqaralyq qarjy naryǵyna 1 mlrd dollardyń oblıgatsııasyn ornalastyrdy. Ótken jyldyń nátıjesinde ekonomıka ósiminiń qarqyny 5,6 paıyzǵa jetti. Ónerkásip óndirisiniń kólemi 6,6 paıyzǵa, eksport 28 paıyzǵa artty. Ózbekstannyń altyn-valıýta rezervi 2,2 mlrd dollarǵa artyp, 28,6 mlrd dollarǵa jetti.
Ózbekstan Prezıdenti 2020 jyldy ǵylym, aǵartý jáne tsıfrlyq ekonomıka jyly dep jarııalady. Osy rette Sh. Mırzıeev bıyl tsıfrlyq ekonomıka damýyn túbegeıli ózgertý qajettigin atap ótti. Birinshi kezekte qurylys, energetıka, aýyl jáne sý sharýashylyǵy, kólik, geologııa, kadastr, densaýlyq saqtaý, bilim berý, murǵat isi salasyn tolyqtaı tsıfrlandyrý qajet. Munan bólek, belsendi ınvestıtsııalyq saıasatty munan ary jalǵastyrý kerek. 2020 jyly Ózbekstan 23 mlrd dollar ınvestıtsııany ıgerip, 206 iri óndiristik nysan qurylysyn qolǵa alýy tıis.