Qazaqstandaǵy otbasylardyń azyq-túlikke jumsaıtyn shyǵyny 10%-ǵa ósti

ASTANA. QazAqparat - Qazaqstandaǵy otbasylardyń azyq-túlik taýarlaryna shyǵyndary 10%-ǵa, azyq-túlik emes taýarlarǵa - 18%-ǵa, aqyly qyzmetterge - 20%-ǵa ósti, dep habarlaıdy QazAqparat Finprom.kz saıtyna silteme jasap.

QR tórt óńirinde - Almaty qalasy, Almaty, Jetisý jáne Túrkistan oblystarynda úı sharýashylyqtarynyń shyǵyndary tabystan asyp túsedi.

Osy jyldyń ekinshi toqsanynda QR úı sharýashylyqtarynyń aqshalaı shyǵystary orta eseppen 774,9 myń teńgege jetti — 2021 jyldyń osy kezeńimen salystyrǵanda 14,5%-ǵa artyq. Úı sharýashylyqtarynyń tabysy bir jyl ishinde 16,4%-ǵa ósip, 2022 jyldyń ekinshi toqsanynda 819,4 myń teńgeni qurady.

Bir úı sharýashylyǵyna jumsalatyn shyǵyndar men kiristerdiń ortasha araqatynasy bir jylda 96,1%-dan 94,6%-ǵa deıin qysqardy. Aqshalaı mándegi kirister men shyǵystar arasyndaǵy aıyrmashylyq bir jyl ishinde 27,1 myń teńgeden 44,5 myń teńgege deıin ósti.

Óńirlik bóliniste eń tómen shyǵystar Qostanaı (orta eseppen bir úı sharýashylyǵyna 559,2 myń teńge) jáne Abaı (573,6 myń teńge) oblystarynda, sondaı-aq Shymkent qalasynda (598,6 myń teńge) baıqaldy. Qostanaı jáne Abaı oblystarynda shyǵystar kiristerdiń 76,5%—yn jáne 74,9%-yn ǵana quraıdy, al Shymkentte kórsetkish is júzinde teń (araqatynasy - 99,8%).