Qazaqstandaǵy ortasha ónimdilik EAEO-daǵy elderdiń kórsetkishinen artta qaldy - Álı Bektaev

ASTANA. QazAqparat - Senator Álı Bektaev Qazaqstannyń astyq salasyndaǵy problemalardy kóterdi. Onda aýyl sharýashylyǵyn órkendetýdegi eskirgen ádister, otandyq tuqym sharýashylyǵynyń tómen deńgeıi, aýyl sharýashylyǵy ónimderin óńdeý salasy kenje qalǵany týraly aıtyldy, dep habarlaıdy QazAqparat tilshisi.

Depýtat otandyq tuqym sharýashylyǵyndaǵy problemalarǵa da nazar aýdardy. Álı Bektaev qazaqstandyq ǵylymı-zertteý ınstıtýttaryndaǵy selektsııalyq jumys deńgeıiniń tómendigin atap ótti. Sonyń saldarynan sharýalar jyl saıyn sheteldik selektsııanyń tuqymyn seýip keledi.

«Ǵalymdar men sarapshylardyń qatystyrylýymen jumys tobyn qurý arqyly Qazaqstannyń astyq óndirisiniń problemalaryn tereń zerdeleý kerek dep esepteımin. Sonyń nátıjesinde agroónerkásip kesheniniń basqa da múddeli salalary ıntegratsııalanǵan astyq óndirisin turaqtandyrý baǵdarlamasy úlgisinde júıeli sharalar ázirlenýi tıis. Atalmysh baǵdarlamanyń jeke bólimi otandyq selektsııany jáne tuqym sharýashylyǵy júıesin damytýǵa arnalýy tıis», - dedi depýtat Senattyń jalpy otyrysynda Úkimet basshysy Álıhan Smaıylovtyń atyna joldaǵan saýalynda.

Budan buryn habarlanǵandaı, búgin Senatta Aýyl sharýashylyǵy mınıstri Erbol Qarashókeev topyraq sapasy nasharlaǵan alqaptar týraly túsinik berdi.