Qazaqstandaǵy nashaqorlardyń naqty sany jarty mıllıonnan asyp ketýi múmkin

ASTANA. 3 maýsym. QazAqparat - Halyqaralyq sarapshylardyń málimetteri boıynsha, «soltústik baǵytqa» jatatyn Aýǵanstan, Qazaqstan, Reseı boıynsha jylyna 100 tonnaǵa jýyq geroın ótedi. Olar Aýǵanstandaǵy 400-den astam zerthanalarda jasalady. Bul týraly búgin Bas prokýratýrada ótken jınalysta QR Bas prokýrorynyń orynbasary Nurmuhambet Isaev málimdedi.

Onyń aıtýynsha, kez kelgen tranzıttik el erte me, kesh pe, báribir esirtki zattaryn tutynýshy elge aınalady. «Statıstıkalyq derekter boıynsha 1991 jyly bizde 10,5 myń nashaqor tirkeýde tursa, 2000 jyly 38 myń, al 2010 jyly 50 myńǵa deıin jetken. Alaıda men ózimniń 1989 jylǵy zertteýlerimde nashaqorlardyń naqty sany týraly derekter tolyǵymen durys bola bermeıtinin aıtqanmyn. Árbir úshinshi nashaqor tirkeýden qashady. 2001 jyly Densaýlyq saqtaý mınıstrligi elimizdegi nashaqorlardyń naqty sany 250 myńnan asyp túsedi degen derekter keltirgen bolatyn. Al keıbir ǵylymı kózder bul sannyń odan áldeqaıda kóp ekenin aıtady, olardyń esepteýinshe elimizdegi nashaqorlardyń sany 500 myńnan asyp ketedi. Menińshe, Densaýlyq mınıstrligi men ǵylymı derekkózderdiń keltirgen sandary resmı statıstıkadan góri naqtyraq sııaqty», - dep atap ótti Bas prokýrordyń orynbasary.

Sondaı-aq, onyń aıtýynsha, el basshylyǵy esirtkige qarsy kúresti údetip keledi, alaıda bul sharalar keıbir adamı faktorlardyń kesirinen tıisti nátıje bermeýde.

Osy oraıda N. Isaev Kedendik baqylaý komıteti men ІІM-niń esirtkige qarsy jumysynyń syn kótermeıtindigin tilge tıek etti. 2008 jyldan beri KBK qyzmetkerleriniń kontrabandany áshkereleý áreketteri 2,5 ese, al ІІM qyzmetkerleriniki 3,5 ese qysqarǵan. Sonymen qatar, anyqtalǵan esirtki tasymaldary kezindegi esirtki kólemi de onsha kóp emes.

«Negizinen, bular tutynýshylarǵa arnalǵan shaǵyn ǵana kontrabandalar. Máselen byltyr oryn alǵan 59 oqıǵanyń 39-ynda alynǵan esirtki zatynyń salmaǵy tasýshyny qylmystyq jaýapqa tartatyn kólemge de jetpegen», - dedi N. Isaev.