Qazaqstandaǵy myrysh óndirýshi kompanııa dırektory: Jas memleketpen qatar damydyq

ÓSKEMEN. QazAqparat – Bıyl elimizdiń egemendik alǵanyna 30 jyl tolsa, «Kaztsınk» JShS-nyń óz jumysyn bastaǵanyna 25 jyl bolyp otyr. Memlekettiń damý joly men myrysh óndirýshi iri kompanııa isiniń ilgerileýi qatar júrdi desek artyq aıtqandyq emes. Búginde seriktestik óńirlerdi damytýǵa jyl saıyn 12 mlrd teńge jumsaıdy. Bul jaıly QazAqparat tilshisine suhbat bergen kompanııanyń bas dırektory Aleksandr Hmelev aıtyp berdi.

- Shırek ǵasyrǵa jýyq ýaqyt ishinde «Kaztsınk» JShS qandaı jetistikterge jetti?

- Kompanııa qurylǵan jyldary zaman múlde basqa edi. Qazaqstannyń táýelsizdik alǵany jýyqta ǵana. Memlekettiń muryndyq bolýymen óz jumysymyzdy bastadyq. Osylaısha, biz jas respýblıkamen qatar damydyq desek te bolady. Zaýyttardyń júıeli jumysyn uıymdastyrý, ujym qalyptastyrý qajet edi. Sóıtip, iske kiristik. 2000 jyly jaǵdaıymyz rettelip, jumysymyz turaqtana bastady.

Ary qaraı damı túsýdiń joldaryn oılastyrdyq. Sol jyldyń maýsym aıynda Shyǵys Qazaqstan oblysy Altaı qalasynan 18 shaqyrymdaı jerde Maleev kenishin saldyq. Kompanııanyń asa iri jerasty kenishine 2017 jyly Pitram ınnovatsııalyq júıesi iske qosyldy. Ol tsıfrly tehnologııalardyń kómegimen burynǵydan da qaýipsiz jumys jaǵdaılary men joǵary eńbek ónimdiligi deńgeıin qamtamasyz ete otyra, kenishti onlaın rejimde basqarýǵa múmkindik beredi.

2010 jyly Vasılkov kenishiniń qurylysy aıaqtaldy. Jańa metallýrgııalyq jobalar júzege asyryldy, zaýyttar salyndy. Jyl saıyn dál osy baǵyttarda jumysty kúsheıtýge tyrystyq.

- Memleket tarapynan kompanııaǵa qandaı kómek kórsetildi?

- Kompanııamyz kez kelgen iri jobany qolǵa alǵan kezde memleketten jan-jaqty qoldaý kórsetildi. Qurylys nysandaryna qatysty jáne basqa da týyndaǵan túrli máselelerdi retteýge jergilikti ákimdikter kóp kómektesti. Elimizdiń qarjylaı ınstıtýttary da demeý bildirdi. Sebebi JShS maqsaty memleket múddelerimen tuspa-tus kelgen.

- Al óz taraptaryńyzdan Qazaqstannyń damýyna qandaı úles qostyńyzdar?

- Bizdiń óndiris oryndary ornalasqan barlyq qalalardyń damýyna qarjylaı qoldaý bildirip kelemiz. Jyl saıyn óńirlerge kómek retinde 12 mlrd teńge bólemiz. Bul aqsha túrli nysandar salýǵa, aýrýhanalardy zamanaýı qurylǵylarmen jabdyqtaýǵa, sportty damytýǵa, mektepter, balabaqshalar men qarttar úıine kerekti zattar alýǵa jumsalady. Ár jylda jergilikti ákimdikpen memorandýmǵa otyryp, sol boıynsha jumys isteımiz. Memleketke tólengen salyq mólsheri jaǵynan kompanııamyz respýblıka boıynsha úzdik úshtikte tur.

- Qazirgi «Kaztsınk» osydan 25 jyl burynǵymen salystyrǵanda qalaı ózgerdi?

- Túbegeıli ózgerdi. Ózimiz de ózgerdik. Ol kezde jaspyz. Bári biz oılaǵanymyzdaı bolatyn sekildi kórindi. Alaıda ýaqyt óte kele ońaı dúnıe joq ekendigin túsindik. Qas qaǵymda jetistikke jetý, bir sátte barlyq máseleni sheshý múmkin emes. Qandaı da bir nátıje bolý úshin tabandy eńbek pen shydamdylyq qajet. Osy ýaqytqa deıin baǵana sóz etken zaýyttar salynyp, kompanııa aýqymy artty. Qaýipsiz eńbekti qamtamasyz etý maqsatynda arnaıy baǵdarlama iske qosyldy. Jetistikterimiz bar. Alaıda damı túsken saıyn odan ary qaraı ósý úshin áli uzaq jol turǵandyǵyn túsinedi ekensiń.

- Aldaǵy josparlaryńyz qandaı?

- Qazirgi tsıfrlandyrý zamanynda kompanııa jumysyna jańa tehnologııalardy kóptep engizip jatyrmyz. Osy baǵytta eńbek ete bermekpiz. Jumysty 100 paıyzdan artyq berilip istegende ǵana nátıje bolady. Bizdiń baǵytymyz osy.

- Áńgimeńizge kóp rahmet!