Qazaqstandaǵy medıtsınalyq jabdyqtardy synaý nátıjeleri endi EAEO aýmaǵynda jaramdy

ASTANA. QazAqparat – Qazaqstannyń synaq zerthanasy Eýrazııalyq ekonomıkalyq odaq tizilimine engizildi, dep habarlaıdy QazAqparat Qazaqstan standarttaý jáne metrologııa ınstıtýtynyń baspasóz qyzmetine silteme jasap.

«Qazaqstandaǵy medıtsınalyq jabdyqtardy synaý nátıjeleri endi Eýrazııalyq odaq aýmaǵynda jaramdy bolady. Bul otandyq óndirýshiler men ımporttaýshylardyń ýaqytyn únemdeıdi jáne qarjylyq shyǵyndaryn qysqartady.

Medıtsınalyq buıymdardyń otandyq óndirýshilerin qorǵaý jáne el ishinde synaqtar júrgizý úshin «QazStandart» óz zerthanasyn tirkeý maqsatynda Keden odaǵynyń Medıtsınalyq buıymdarǵa zertteýler (synaqtar) júrgizý quqyǵyna ıe ýákiletti uıymdardyń biryńǵaı tizilimine engizdi.

2026 jylǵy 1 qańtardan bastap EAEO sheńberinde Medıtsınalyq buıymdar (medıtsınalyq maqsattaǵy buıymdar men medıtsınalyq tehnıkanyń) aınalysynyń biryńǵaı qaǵıdattary men qaǵıdalary týraly kelisim kúshine enetinin atap ótemiz», - delingen baspasóz málimdemesinde.