Qazaqstandaǵy kommýnaldyq qaryzdar 23,8% tómendedi - Baqytjan Saǵyntaev

ASTANA. QazAqparat - Qazaqstanda kommýnaldyq qyzmetter boıynsha eń úlken qaryz Astana men Almaty qalalaryna tıesili. Bul týraly QR Premer-Mınıstri Baqytjan Saǵyntaevtyń depýtattyq saýalǵa jaýabynda  aıtyldy, dep habarlaıdy QazAqparat.

Resmı jaýapta kórsetilgendeı, maýsym aıynda kommýnaldyq kásiporyndar aldyndaǵy jalpy qaryz 11,7 mlrd teńgeni qurady, onyń ishindegi halyq qaryzy - 7,4 mlrd teńge.

«Mundaı jaǵdaıda Úkimet halyqtyń qaryz máselesin sheshý boıynsha keshendi shara qabyldaýy tıis. Jańa menshik ıelerine mindettelmeıtin páterdiń burynǵy qojaıyndardyń qaryzy da qıyndyq týǵyzyp otyr. Іs júzinde mundaı qaryzdardy qaıtarý óte qıyn. Úlken debıtorlyq qaryzdyń bolýy nesıelik mindettemelerdi, jóndeý-ázirleý jumystaryn atqarýda JES úshin aıtarlyqtaı máseleler týǵyzýy múmkin», - dedi Premer-Mınıstrge Parlament Májilisiniń depýtaty Shavhat Ótemisov.

Baqytjan Saǵyntaev qaryz kórsetkishteriniń ótken jylmen salystyrǵanda 23,8% -ǵa nemese 3,6 mlrd teńgege tómendegenin atap ótti.

Onyń aıtýynsha, zańǵa sáıkes, kommýnaldyq qyzmet kórsetýshi men tutynýshy ózara kelisimshart jasasady. Kelisimshartqa sáıkes, qaryz bolǵan jaǵdaıda tutynýshylar sot tártibimen  jaýapkershilikke tartylady. Azamat ózine tıesili múliktiń aldyndaǵy óz mindettemeleri úshin jaýap beredi.

Sonymen birge, ákimdikter tabıǵı monopolııalar sýbektilerimen birge buqaralyq aqparat quraldary arqyly tutynýshylarǵa únemi habar berip otyrady. Qajet bolǵan jaǵdaıda ákimdikter kommýnaldyq qyzmet kórsetýshilerdiń usynystaryn eskere otyryp, qaryzdy azaıtý boıynsha sharalar algorıtmin ázirleıdi.

«Joǵaryda aıtylǵandy eskere otyryp, QR qoldanystaǵy zańnamasynda qaryzdy sot tártibinde óndirip alýdyń jetkilikti mehanızmi kórsetilgen dep esepteımiz», - delingen jaýapta.