Qazaqstandaǵy qoǵamdyq baqylaý júıesin damytý sarapshylar klýbynyń otyrysynda talqylandy

ASTANA. QazAqparat - Búgin Astanada «Qoǵamdyq baqylaý mehanızmderin engizý: máseleler men tıimdi sheshimder» taqyrybynda Qazaqstannyń saıasattanýshylar Kongresi Sarapshylar klýbynyń úshinshi otyrysy ótti.

Sharany QR Mádenıet jáne sport mınıstrliginiń qoldaýymen «Saıasattanýshylar kongresi» RQB uıymdastyrdy.

Sarapshylar klýbynyń jıynyna qazaqstandyq saıasattanýshylar men áleýmettanýshylar, sonymen birge Qyrǵyzstan jáne Reseı sarapshylary qatysty.

Otyrysta Qazaqstandaǵy qoǵamdyq baqylaý júıesin damytýdyń negizgi máselelerine ǵylymı saraptama júrgizildi.

Sarapshylar «100 naqty qadam» Ult josparynda qarastyrylǵan qoǵamdyq baqylaý mehanızmderin engizý alǵa bastaıtyn qadam ekenin atap ótti.

«Qoǵamdyq keńester týraly» QR Zańy qabyldanýynyń mańyzy atalyp ótildi. Bul memlekettik qyzmetkerler qyzmetiniń ashyqtyǵy men tıimdiligin arttyrýǵa múmkindik beredi.

Otyrysqa qatysýshylar qoǵamdyq baqylaýdyń kúsheıýi memleket pen qoǵamnyń jańǵyrý úderisiniń mańyzdy bóligi ekenin atap kórsetti.