Qazaqstandaǵy qazirgi daǵdarysty «Azııa jolbarystary» da basynan ótkergen – reseılik sarapshy
«Komsomolskaıa pravda» gazeti suhbat berýshi Vladıslav Inozemtsevti saıasatker, ekonomıka ǵylymdarynyń doktory, áleýmettanýshy dep tanystyrǵan. Sarapshy elimizde bolǵan dúmpýdi qazir «Azııa jolbarystary» atalyp júrgen elderdiń basyndaǵy ótpeli kezeńdermen salystyrady.
«Qazaqstan 2010 jyldardyń ortasyna deıin postkeńestik elderdiń ishindegi eń tabysty melekettiń biri boldy. Reseıden basty aıyrmashylyǵy – shetelden ınvestıtsııa tartý baǵytynda ózin ashyq etip kórsetti. Reseı 2016 jylǵa taman ǵana sovet kezindegi munaı óndirisiniń kólemine qol jetkizse, Qazaqstanda bul kezde munaı óndirisiniń kólemi 1990 jylǵy kórsetkishinen 3,6 ese, gaz óndirisi boıynsha 6 ese, ýran óndirisi boıynsha 14 ese alǵa ketip qalǵan bolatyn. Onyń ústine qazaqtar ınnovatsııamen áýestene bastady. Reseıde D.Medvedev halyqaralyq qarjy ortalyǵyn qurý kerek dep júrgen kezde Qazaqstan sondaı ortalyqta quryp ta qoıǵan edi. Ol ortalyq aǵylshyn quqyǵynyń negizinde jumys isteıdi», - dep eske alady reseılik maman.
Sondaı-aq, ol Ońtústik Koreıa, Indnonezııa, Taıvan, Malaızııa sııaqty elderdiń basynan da osyǵan uqsas kezeńder ótkenin aıtady.
«Biraq ortalyqtandyrylǵan bılik jemqorlyq pen áýlet aınalasyna toptasý sııaqty jaǵymsyz qubylys týǵyzatyny bar. Ońtústik Koreıada, Taıvanda, Indonezııada, eleýsiz dárejede bolsa da Malaızııada ındýstrıaldaný, jańǵyrý jyldam júrdi. Ol qarqyndy ustap turý úshin qarajatty da aıamaı quıyp otyrý kerek edi. Mundaı jaǵdaıda qarapaıym halyq utady dep aıtýǵa kelmeıdi. Al Qazaqstannyń jaǵdaıynda áýelde jyldam bastalǵan damý qarqyny kenet báseńdedi. Bul adamdardyń narazylyǵyn týǵyzdy. Qazaqstanda qańtardyń basynda bolǵan oqıǵalar osyndaı jaıttardan týyndady dep oılaımyn», - deıdi ekonomıst.
Aıtýynsha, Qazaqstannyń basyndaǵy jaǵdaı Indonezııadaǵy aýyr kezeńge kóbirek uqsaıdy.
«1998 jyly Indonezııada da osylaı bolǵan. Ekonomıkalyq problemalardyń saldarynan eldi 30 jyl basqarǵan Sýharto bılikten qulady. Al Ońtústik Koreıada 1979-80 jyldary halyqtyń tolqýy avtorıtarlyq júıeni ydyratyp, jańa basshyny bılikke ákeldi. Ol basshy elin salystyrmaly túrde demokratııalandyrdy. Qazaqstanda osyǵan uqsas oqıǵanyń órbýine sátsiz bılik tranzıti túrtki boldy», -deıdi Vladıslav Inozemtsev.