Qazaqstandaǵy kásiporyndarǵa ınvestıtsııalyq jeńildikter beriletin boldy
11:35, 09 Qańtar 2018
ASTANA. QazAqparat - Salyq salý máseleleri jónindegi Qazaqstan Respýblıkasynyń Zańy aıasynda Kásipkerlik kodeksiniń ınvestıtsııalyq jobalar, olarǵa qatysty artyqshylyqtar men sharttarǵa ózgertýler men tolyqtyrýlar engizilmek. Bul týraly QR Investıtsııalar jáne damý mınıstrliginiń málimetinde aıtylǵan, dep habarlaıdy QazAqparat.
QR IDM Investıtsııalar komıtetiniń aqparatyna súıensek, ınvestıtsııalyq klımatty jaqsartý maqsatynda jumys istep turǵan kásiporyndardy korporatıvtik tabys salyǵynan úsh jyl merzimge bosatý qarastyrylyp otyr. Bul jeńildik 5 mıllıon AEK mólsherinde ınvestıtsııa salynǵan jaǵdaıda júzege asyrylady.
Sondaı-aq ınvestıtsııalyq artyqshylyqtar týraly ótinishke qosa beriletin qujattar tizimi ońtaılandyrylǵan. Osylaısha, qurylys-montaj jumystarynyń smetalyq qunyn jáne negizgi quraldardy, shıkizatty jáne materıaldardy satyp alý shyǵyndaryn negizdeıtin birqatar qujattar alynyp tastaldy.
Eske sala keteıik, jańa Salyq kodeksine Memleket basshysy 2017 jyldyń jeltoqsan aıynda qol qoıǵan bolatyn. Atalmysh qujat 2018 jyldyń 1 qańtarynan bastap kúshine endi.