Qazaqstandaǵy iri qara mal basy ashyǵyp júr - Qaırat Aıtýǵanov

ASTANA. QazAqparat - Qazaqstandaǵy iri qara mal basy tıisti deńgeıde jemdelmeı júr. Bul týraly Májiliste «Halyq kommýnısteri» fraktsııasynyń «Jeke sharýashylyqtardy kopperatsııalaý - ónim óndirisin ulǵaıtýdyń joly» taqyrybyndaǵy keńeıtilgen otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.

«Oblystar men aýdandar boıynsha esepteı kele, búginde elimizdegi mal basy ashyǵyp júrgenin baıqadyq. Osy oraıda bul iri qaradan et pen sút ónimdiligin talap etý orynsyz. Sebebi mal basy tıisti deńgeıde jemdelmegen. Táýligine bir janýar 9 birlik azyq ólshemi (osymen jem-shóptiń juǵymdylyǵy men energetıkalyq qunarlyǵy anyqtalady) deńgeıinen kem emes tutynýy tıis. Búginde jeke sharýashylyqtardaǵy mal basyna 2,9 birlik azyq ólshemi beriledi, ıaǵnı úsh ese az. Osyndaı kórsetkishpen et pen sút óndirý jaıynda aıtý qıyndaý. Al uıymdastyrylǵan sharýashylyqtarda 5,2 birlik azyq ólshemimen qamtylǵan. Atap aıtqanda, bundaı kórsetkishter janýarlardyń ashyǵyp júrgenin bildiredi»,-dedi Qaırat Aıtýǵanov.

Onyń sózine qaraǵanda, et pen súttiń qurylymyna nazar aýdarý kerek, ıaǵnı ózindik qunynda 70 paıyzǵa deıingi kólemin jem-shóp quraıdy.

«Eger jem-shópti óndirý deńgeıin arttyrmasaq, arzan et pen sútke qol jetkizý múmkin emes»,-dep túsindirdi birinshi vıtse-mınıstr.