Qazaqstandaǵy eń uzyn kópirdiń qurylysy ýaqtyly aıaqtalmaýy múmkin

ÓSKEMEN QazAqparat – Shyǵys Qazaqstan oblysyndaǵy Kúrshim men Samar aýdandaryn jalǵaıtyn «Qyzyl tý» ótkeline salynyp jatqan kópir qurylysy ýaqytyly aıaqtalmaı qalýy múmkin, dep habarlaıdy QazAqparat tilshisi.

Buqtyrma sý qoımasy arqyly ótetin kópir Prezıdent Qasym-Jomart Toqaevtyń tapsyrmasymen 2021 jyly salyna bastaǵan.

Bul - Qazaqstandaǵy eń uzyn kópir bolatyny, jalpy uzyndyǵy - 1316 metrdi quraıtyny aıtylǵan edi.

Jospar boıynsha kópir qurylysy 2024 jylǵa deıin aıaqtalýy tıis bolatyn.

Biraq bir jyldyń ishinde kópir salynyp bitpeıtin sekildi. Buǵan sebep - qarjy máselesi. Kópirdiń qurylysyna respýblıkalyq bıýdjetten qarjy bólinýi qajet.

ShQO ákimdiginde ótken máslıhat sessııasynda aımaq basshysy Ermek Kósherbaev bul asa mańyzdy kópir qurylysy mindetti túrde aıaqtalatynyn aıtty.

«Kópirge respýblıkalyq bıýdjetten qarajat bólinýi tıis. Alaıda qazirgi ýaqytta qarjylandyrý máselesi naqty sheshimin tapqan joq. Biraq úkimetpen kelissózder júrgizilýde. Sondyqtan qurylys jumystary mindetti túrde aıaqtalady. Biraq qarajattyń qashan bólinetini ázirge belgisiz», - deıdi ol.

Eske salsaq, bıyl kóktemde Buqtyrma arqyly ótetin kópir qurylysyna taǵy 15 mlrd teńge qajettigi habarlanǵan.