Qazaqstandaǵy egis naýqanyn qarjylandyrýǵa 60 mlrd astam teńge baǵyttaldy - «QazAgro»

ASTANA. QazAqparat - Qazaqstannyń negizgi astyq egetin oblystarynda egý naýqany bastaldy, ońtústik óńirlerde kóktemgi egý jumystary jalǵasýda, olardy júrgizýge «QazAgro» ulttyq holdıngi qarjylandyrýdyń barlyq esebinen jalpy kólemi 61,2 mlrd teńge baǵyttaý josparlanǵan, olardyń ishinde 40 mlrd teńge - bıýdjettik nesıe, dep habarlady www.primeminister.kz holdıngtiń baspasóz qyzmetine silteme jasap.

«Osy jyldyń kóktemgi egis jumystaryn qoldaýǵa «QazAgro» Ulttyq holdıngi barlyq qarjylandyrý kózderinen jalpy kólemiń 61,2 mlrd. teńge baǵyttaýdy kózdep otyr, onyń 40 mlrd. teńgesi - bıýdjettik nesıe», - delingen habarlamada.

Sarapshylardyń baǵalaýy boıynsha, holdıngten egin naýqanyna bólingen qarajat 6,2 mln. ga jerde agrotehnıkalyq sharalardy ótkizýge múmkindik beredi. Holdıngtiń málimetinshe, búgingi kúni «QazAgro» kompanııasyna aýyl sharýashylyǵy taýar óndirýshilerinen 3 myńnan astam ótinimder kelip tústi, ótinimderdiń jıyntyq somasy 28,9 mlrd. teńgeni quraıdy. Bul kórsetkishtiń 2,5 myń ótinimi búginde maquldandy. 14,5 mlrd. teńgeni quraıtyn 1,6 myńnan astam ótinimder qarjylandyryldy.

Kóktemgi egis jumystaryn nesıelendirýge kelip túsken eń kóp ótinimder - Qostanaı oblysy (962 ótinim), Aqmola oblysy (694), Ońtústik Qazaqstan oblysy (616), Soltústik Qazaqstan oblysy (357) jáne Pavlodar oblysy (144)aımaqtardy qamtıdy .

Egin naýqanyn qarjylandyrýdy «QazAgro» Ulttyq holdınginiń quramyndaǵy úsh damý ınstıtýttary júrgizedi - «Agrarlyq nesıe korporatsııasy» AQ, «Azyq-túlik kelisim shart korporatsııasy» AQ jáne «Aýyl sharýashylyǵyn qarjylaı qoldaý qory» AQ. Budan bólek AÓK sýbektileriniń nesıe kózderine qoljetimdiligin arttyrý úshin «QazAgro» Ulttyq holdıngi respýblıkanyń agrosalasyndaǵy sharýashylyqtardy qarjylandyrýǵa birqatar ekinshi deńgeıli bankterdi qarjylandyrdy. Bul maqsattarǵa holdıng bıýdjettik nesıeden 20 mlrd. teńge bóldi. Búgingi kúni egin naýqanyna bankter 16,2 mlrd. teńgeden astam somaǵa qarjylandyrý jumystaryn júrgizdi. Nesıelendirý standartty banktik rásimder boıynsha júzege asyrylady.

Qarjylyq resýrstardan bólek «QazAgro» aýyldyqtardyń mashına-traktor parkin jańalaý suraqtaryn sheshýde. Agrarshylarǵa qajetti aýyl sharýashylyq tehnıkasyna qol jetkizýdi «QazAgroQarjy» AQ lızıng pen nesıelendirý quraldary boıynsha júzege asyrýda.

Búginde kompanııada 11,6 mlrd. teńgeni quraıtyn 1 334 birlik tehnıkaǵa kelip túsken ótinimder jumys ústinde. Qarjylyq lızıng mámileleri 7,1 mlrd. teńge somasyna 745 birlik tehnıkany ıemdenýge jasaldy.