Qazaqstandaǵy dúkenderde áleýmettik mańyzdy taýarlarǵa retro-bonýstar qoldanylmaıdy

ASTANA. QazAqparat - Qazaqstandaǵy saýda oryndarynda áleýmettik mańyzy bar taýarlarǵa retro-bonýstardy qoldanýǵa tyıym salynady. Bul týraly Parlament Májilisinde tilshilerge QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Osyǵan deıin ótken Úkimet otyrysynda áleýmettik mańyzy bar taýarlardyń baǵasy týraly baıandaǵan bolatynbyz. Osy oraıda bizdiń zań ázirleý jumysymyz aıasynda tıisti zań jobasyna bastamashylyq ettik. Qujat aıasynda saýda jelilerimen retro-bonýstardy qoldanýǵa tyıym salý eskerilgen», - dedi mınıstr.

Bul turǵyda Tımýr Súleımenov retro-bonýsqa qatysty túsinik berdi.

«Kelisimshart bekitilgennen keıin, osyǵan sáıkes taýar saýda jelisinde satylady. Osy oraıda kásipker taýardyń ótkizilgeni úshin ónimniń tıisti paıyzdyq somasyn dúkenge beredi. Bir jaǵynan bul jaqsy tájirıbe, ıaǵnı dúken taýardyń ótimdiligin jaqsartý úshin, ony jaqsy kórinetin sórelerge qoıady. Alaıda basqa jaǵynan alyp qaraǵanda, áleýmettik mańyzy bar taýarlar boıynsha baǵa júktemesi tutynýshyǵa áser etedi. Sondyqtan da biz Saýda kásiporyndary qaýymdastyǵymen bul máseleni qarastyrǵan boltynbyz. Sáıkesinshe, olar bizdiń usynysqa qoldaý bildirip, áleýmettik mańyzy bar 19 taýar boıynsha retro-bonýstar qoldanylmaıdy», - dedi vedomstvo basshysy.

Bul turǵyda Tımýr Súleımenov tıisti zań jobasy osy aptada Parlament Májilisiniń qaraýyna engiziletinin, sondaı-aq jyl sońyna deıin qujat qabyldanýy múmkin ekenin atap ótti.

Osyǵan deıin Tımýr Súleımenov memlekettik-jekeshelik áriptestiktiń damý qarqyny týraly málimetterdi jarııalady.