Qazaqstandaǵy býkmeker keńselerinde alkogolge tyıym salynady

ASTANA. QazAqparat - QR Mádenıet jáne sport mınıstrliginiń jaýapty hatshysy Qýatjan Ýálıev «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasy tujyrymdamasy aıasynda josparlanyp otyrǵan ózgerister týraly baıandady, dep habarlaıdy QazAqparat.

Atap aıtqanda, jaýapty hatshy býkmekerlik keńselerde alkogoldik ishimdikterdi satýǵa tyıym salý qarastyrylyp otyrǵandyǵyn jetkizdi.

«Bizdiń oıymyzsha, qyzmettiń atalǵan túrlerin alkogoldik ónimdi satý múmkindigimen qatar júrgizýge jol berilmeýi tıis. Bundaı jaǵdaı jastarǵa eleýli túrde keri áser etedi»,-dep túsindirdi Ýálıev Ádilet mınıstrliginde zań jobalaý qyzmeti máseleleri jónindegi vedomstvoaralyq komıssııanyń kezekti otyrysynda.

Onyń sózine qaraǵanda, «Etıl spırti jáne alkogoldik ónimder óndirisi men aınalymyn memlekettik retteý týraly» Zańyna býkmeker keńseleri men totalızatorlarda alkogoldik ónimderdi satýǵa tyıym salýdy engizý usynylyp otyr.

«Býkmeker keńseler men totalızatorlarda olardyń qyzmeti sportpen shuǵyldaný men salaýatty ómir saltyna qyzyǵýshylyqty janama túrde arttyrýdyń ádisi retinde túsinik beriledi. Sol arada keıbir býkmeker keńseleri men totalızatorlarda alkogoldik ishimdikter satylady nemese tegin taratylady. Bul óz kezeginde marketıngtik maqsattarda, sondaı-aq oıynshynyń jaǵdaıdy túsiný sezimin basý baǵytynda jasalady. Osy oraıda oıynshyny salatyn aqsha kólemin arttyrýǵa ıtermeleıdi»,-deıdi Qýatjan Ýálıev.