Qazaqstandaǵy bıznes-ahýal ındeksi jaqsardy - UB

ASTANA. QazAqparat – Ótken aqpan aıynda iskerlik belsendilik ındıkatory 50,0 kórsetti. Bul oń jáne teris ózgerister bolmaǵanyn bildiredi, dep habarlaıdy QazAqparat Ulttyq bankke silteme jasap.

«Indeks máni 49,1-den 51,6-ǵa deıin kóterilgen qurylysta iskerlik belsendiliktiń jaqsarǵany baıqalady. Qyzmet kórsetý sektorynda ındekstiń tómendeýine qaramastan, ol 50,6 bolyp (2023 jylǵy qańtarda – 52,0), ósý aımaǵynda qaldy. Óndiriste iskerlik belsendilik ındeksi qańtardaǵy 51,0-den 49,7-ge deıin azdap túsip, tómendeý jaǵyna ótti. Taý-ken óndirý ónerkásibinde kórsetkish bıylǵy qańtarda 45,8-den 46,6-ǵa deıin azdap jaqsarǵany baıqaldy, degenmen, kórsetkish teris aımaqta qaldy. Óndiris pen taý-ken óndirý ónerkásibinde jumyspen qamtý deńgeıi de tómendegen», - delingen Ulttyq bank habarlamasynda.

Sonymen qatar bıznes-ahýal ındeksi azdap jaqsardy. Kásiporyndardyń baǵalaýy boıynsha, bıznesti júrgizýdiń aǵymdaǵy jaǵdaıy azdap tómendeýine qaramastan, jalpy qolaıly sanalady, al bolashaq jaǵdaılarǵa qatysty kútýler jaqsarǵan.

Nátıjesinde, aǵymdaǵy jáne bolashaq bıznes jaǵdaılardyń ortasha baǵasyn bildiretin bıznes-ahýal ındeksi 12,8-ge deıin kóterilip (2023 jylǵy qańtardaǵy 11,9-dan), bıznes-tsıkl «saǵatynyń» kórestkishi ósý aımaǵynda qaldy.