Qazaqstandaǵy birqatar joǵary oqý ornyna qatysty ákimshilik is qozǵaldy
«Bilim jáne ǵylym mınıstrligi memlekettik baqylaýdy júrgizýge kedergi keltiretin birqatar joǵary oqý ornyna qatysty tıisti sharalar qabyldamaq. Ákimshilik ister qozǵaldy, materıaldar sotqa jiberildi», delingen mınıstrlik taratqan aqparatta.
Ondaǵy derekterge qaraǵanda, 2019 jyly Ortalyq Azııa ýnıversıtetinde jáne Aqtaý gýmanıtarlyq-tehnıkalyq ýnıversıtetinde (burynǵy Qazaqstan teńiz ýnıversıteti) tekserý júrgizildi, onyń nátıjeleri boıynsha bilim berý salasyndaǵy zańnama normalarynyń kóp buzylǵany anyqtaldy.
Búginge deıin atalǵan ýnıversıtetter tekserýdiń kelesi kezeńin júrgizýge kedergi keltiretin túrli sharalar (sot tártibimen shaǵymdaný, shaǵyn kásipkerlik sýbektisi retinde uıymdyq-quqyqtyq nysanyn ózgertý, qajetti materıaldardy usynbaý jáne t.b.) qoldanyp keledi. Atalǵan eki joǵary oqý ornyna qatysty ákimshilik is qozǵalyp, materıaldar mamandandyrylǵan sottarǵa jiberildi. Eki JOO da sot sheshimderiniń kúshine enýine qaraı tekserýler júrgiziledi.
«Astana» ýnıversıtetinde josparly tekserý 2020 jyldyń basynda júrgizilýi kerek edi. Alaıda ýnıversıtet qajetti materıaldardy usynbady, osylaısha profılaktıkalyq baqylaý júrgizýge kedergi keltirdi. Sot talqylaýynyń nátıjesinde JOO-lar ákimshilik jaýapqa tartyldy.
Bul rette Aqtaý gýmanıtarlyq-tehnıkalyq ýnıversıteti men «Astana» ýnıversıteti tanylǵan arnaıy organdardyń tizilimine engizilgen akkredıtteý agenttikterinde akkredıtteýden ótpegen. Budan bólek, sońǵy eki jylda «Atameken» UKP ótkizetin joǵary oqý oryndarynyń bilim berý baǵdarlamalarynyń reıtıngi negizinen bul joǵary oqý oryndarynyń sońǵy pozıtsııalarda ekenin kórsetedi.
«Bilim týraly» QR Zańyna sáıkes, atalǵan joǵary oqý oryndary qazirgi ýaqytta 2020 jylǵy túlekterge dıplom bere almaıdy. Sońǵy kýrs stýdentteriniń múddelerin eskere otyryp, bul ýnıversıtetter dıplom berý úshin akkredıtteýden ótýi kerek.
« Talapkerlerdiń nazaryn joǵary oqý ornyn durys jáne sanaly túrde tańdaýǵa aýdarǵymyz keledi . Óıtkeni 2021 jyldan bastap joǵary oqý oryndarynyń óz úlgisindegi dıplomdarynyń bedeli bolady, bul keıinnen jumysqa ornalasýǵa áser etedi. Qazir barlyq túlek joǵary oqý ornynyń bedeline jáne onyń bilim berý naryǵyndaǵy jaǵdaıyna qaramastan, memlekettik úlgidegi birdeı dıplom alady. Bizdiń oıymyzsha, jumys berýshiler bolashaq mamandy « kim « daıyndaǵanyn bilýi kerek jáne JOO -lar arasynda myqty básekelestik bolýy kerek. Jeke úlgidegi dıplomdar júıesin engizgennen keıin JOO -nyń talapkerler men jumys berýshiler aldyndaǵy jaýapkershiligi artady. Myqty maman bolý úshin nátıjege jumys isteıtin jáne belgili bir saladaǵy naryqta kóshbasshy bolyp tabylatyn ýnıversıtetti tańdaý kerek. Tek osylaı ǵana joǵary bilim berý júıesin josyqsyz qyzmet kórsetýshilerden « tazartýǵa « bolady « , – dep atap ótti QR BǴM Bilim jáne ǵylym salasyndaǵy sapany qamtamasyz etý komıtetiniń tóraıymy Gúlzat Kóbenova.