Qazaqstandaǵy bala ólimi eki esege azaıdy – Eljan Birtanov

NUR-SULTAN. QazAqparat – QR Desnaýlyq saqtaý mınıstri Eljan Birtanov elimizdegi balalardyń týýy men ólimi statıstıkasyn jarııalady, dep habarlaıdy QazAqparat tilshisi.

«Elimizdegi bala ólimin azaıtý – memlekettiń tutas ekonomıkalyq-áleýmettik damý deńgeıindegi mańyzdy kórsetkish. Bul týraly BUU, Dúnıejúzilik densaýlyq saqtaý uıymy syndy halyqaralyq uıymdardyń arnaıy reıtıngi bar. Qazaqstandaǵy bala ólimi sońǵy 7 jylda eki esege azaıdy. Bul Úkimet pen jergilikti atqarý organdary atqarǵan jumystyń nátıje bergenin bildiredi. Kún saıyn elimizde myńǵa jýyq bala dúnıege keledi. Bir jylda bul kórsetkish 380-400 myńǵa jetedi», - dedi mınıstr QR Densaýlyq saqtaý mınıstrliginde ótken brıfıngte.

Sonymen birge, mınıstr Atyraý oblysyndaǵy atyshýly náreste ólimine qatysty pikir bildirdi.

«Bul – óte úlken aıyptaý, muny estigende tańǵaldyq. Órkenıetti qoǵamda mundaı áreketke jol berilmeýi tıis. Biraq, taǵylǵan aıyp dáleldenýi qajet. Quqyq qorǵaý organdary tolyqqandy ádil tergeý júrgizedi dep senemin. Sonymen birge, Densaýlyq saqtaý mınıstrligi retinde júıeli máselelerdiń bar ekenin túsinemiz jáne olardy sheshý úshin turaqty jumys istep kelemiz», - dedi E. Birtanov.

Aıta keteıik, búgin Eljan Birtanov Atyraý oblysyndaǵy sábı ólimi týraly málimdeme jasady.

Eske sala ketsek, Atyraý oblysy perınataldy ortalyǵynyń basshysy men dárigeri jańa týǵan náresteni tońazytqysh kamerasyna salyp óltirdi degen kúdikke ilindi.

Sybaılas jemqorlyqqa qarsy is-qımyl agenttiginiń habarlaýynsha, dárigerler náreste ólimi faktisin jabý úshin para bermek bolǵan.