Qazaqstandaǵy BAQ etnosaralyq qatynas salasynda obektıvti habar taratyp keledi - Prezıdent

NUR-SULTAN. QazAqparat – Jýrnalıster qazaqstandyq qundylyqtar aınalasynda ultty biriktirýde asa mańyzdy mıssııany oryndap keledi. Bul týraly Qazaqstan halqy Assambleıasynyń kezekti otyz birinshi sessııasynda Prezıdent Qasym-Jomart Toqaev málim etti, dep habarlaıdy QazAqparat tilshisi.

«Otandyq buqaralyq aqparat quraldarynyń maqsaty elimizdegi jáne álemdegi jaǵdaı týraly otandastarǵa beıtarap ári jedel aqparat taratýmen baılanysty. Bizdiń tilshiler qazaqstandyq qundylyqtar aınalasynda ultty biriktirý, bizdiń memlekettilik pen halyqtyń birligin nyǵaıtý boıynsha asa mańyzdy mıssııany oryndap keledi», - dedi Qasym-Jomart Toqaev.

Prezıdenttiń aıtýynsha, ulttyq birlikke nuqsan keltirý maqsatyn kózdeıtin arnaıy baǵyt bar. Osy oraıda Qazaqstan halqy bul máselede saqtyq tanytyp, arandatýdyń shyrmaýyna túsip qalmaǵany mańyzdy.

«Qazaqstanda jalpy baspasóz basylymdary, radıo, telearnalar etnosaralyq qatynastar salasynda obektıvti habar taratady. Alaıda álemdegi sońǵy oqıǵalar aqparattyq turǵyda bizdiń qoǵamdy keıde baǵyttan adastyryp jatatynyn kórip júrmiz. Elimizdiń ár azamaty jarııa alańǵa kirgende bizdiń ulttyq múddeni basshylyqqa alýy kerek», - dedi Memleket basshysy.

Osyǵan deıin QR Prezıdenti tóraǵalyǵymen Qazaqstan halqy Assambleıasynyń HHHІ sessııasy ashylǵanyn jazdyq.

Memleket basshysy Assambleıa Senat depýtattyǵyna kandıdattardy irikteýdiń tıimdi ári ashyq rásimin ázirleýi kerek ekenin aıtty.