Qazaqstandaǵy avtokólikterdiń 61 protsenti Qostanaı oblysynda jasalady

ASTANA. QazAqparat – Jyl basynan beri Qostanaı oblysynda 35 myńnan astam avtomobıl qurastyryldy jáne 7,1 myń kólik eksportqa jiberildi. Bul týraly Qostanaı oblysynyń ákimi Qumar Aqsaqalov aıtty, dep habarlaıdy QazAqparat tilshisi.

«Mashına jasaýda shyǵarylatyn jeńil avtomobılder modelderiniń jelisi keńeıtilip keledi. Respýblıkada óndirilgen barlyq avtokóliktiń 61 protsenti Qostanaı oblysynda qurastyrylǵan. Jyl basynan beri 35 myńnan astam avtomobıl qurastyryldy, onyń ishinde eksportqa jiberilgeni – 7,1 myń kólik», - dedi Q. Aqsaqalov elordada Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, mashına jasaý salasynda jańa jobalar da iske asyrylyp keledi.

«Mysaly, «SaryarqaAvtoProm» JShS qýattylyǵy jylyna 30 myń kólik bolatyn, quny 23,4 mlrd teńgege jetetin «Chevrolet Onix» avtomobılderin shaǵyn toraptyq óndirý jobasy boıynsha belsendi jumys isteýde. Ol 400 jumys ornyn qurýǵa múmkindik beredi», - dedi óńir ákimi.

Sonymen birge, oblystaǵy Indýstrıaldy aımaqta traktor kabınalaryn shyǵaratyn zaýyt iske qosylady. Oǵan qosa, arnaıy shynjyr tabandy tehnıka shyǵaratyn zaýyt qurylysyn bastaý josparlanǵan.