Qazaqstandaǵy Aýǵanstan elshiliginiń ǵımaraty tálipterge beriledi

ASTANA. QazAqparat – Qazaqstan Aýǵanstannyń jańa ákimshiligi dıplomattaryn akkredıtteıtin boldy. Bul týraly BAQ ókilderiniń qatysýymen ótken brıfıngide QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Aýǵanstannyń jańa ákimshiligi bizge dıplomattardy akkredıtteý týraly ótinish joldady. Biz olardy tirkeý jóninde sheshim qabyldadyq. Aıta keteıin, 2021 jyldyń tamyzynda burynǵy rejım qulaǵan soń elde «bılik vakýýmy» paıda boldy. Aýǵanstan Islam Respýblıkasynyń sheteldegi elshilikteri bul memlekettiń atynan ókildik etýin toqtatty», - dedi Aıbek Smadııarov.

Syrtqy ister mınıstrliginiń resmı ókili Aýǵanstan máselesi áli de halyqaralyq qaýymdastyqtyń qyzý talqylaýynda bolatynyn atap ótti.

«Keshe Samarqan qalasynda Aýǵanstanmen kórshiles elderdiń kezekti kezdesýi ótti. Biz Aýǵanstannyń birtutas bolǵanyn ári kórkeıgenin qoldaımyz. Aýǵanstannyń jańa ákimshiligi ókilderiniń bizge kelýi – moıyndaý degendi bildirmeıdi. Bul másele BUU-nyń quzyrynda qalady», - dep atap ótti Aıbek Smadııarov.

Sonymen birge, ol osyndaı mıssııalar Ózbekstan, Qyrǵyzstan, Túrikmenstan, Reseı, Qytaı, Qatar, Birikken Arab Ámirlikteri jáne Pákistanda bar ekenin eske saldy.

Aıta keteıik, 2021 jyly Aýǵanstannyń bıligine kelgen «Talıban» - Qazaqstanda tyıym salynǵan uıymdar qataryna jatqyzylǵan.