Qazaqstandaǵy áýe kompanııalardyń qyzmet quny 27 paıyzǵa ósti

NUR-SULTAN. QazAqparat – Bıyl qańtar-shilde aılarynda Qazaqstanda áýe kompanııalarynyń tabysy 276,8 mlrd teńgege jetti. Bir jyl buryn bul kórsetkish 189,2 mlrd teńgeni quraǵan edi, dep habarlaıdy QazAqparat.

«270,6 mlrd teńge somasyndaǵy negizgi kiris barlyq baǵyt boıynsha jolaýshylar tasymaly esebinen qalyptasty. Taǵy 6,2 mlrd teńgesi júk tasymalyna tıesili. Kólikti jalǵa berýden túsken kiris 3 mlrd teńge boldy», - delingen finprom.kz málimetinde.

2022 jylǵy qańtar-shildede áýe kóligimen 5,8 mln adam saparlap, bul kórsetkish byltyrǵa qaraǵanda 12,8 paıyzǵa artyq. Shilde aıynda 1,2 mln adam tasymaldanyp, byltyrǵydan 7,3 paıyzǵa kóbirek boldy.

Jolaýshy tasymalynyń basym bóligi Almatyǵa tıesili, ıaǵnı 4 mln adam áýe kóligimen saparǵa shyqty.

Sonymen qatar, ushaqpen 12,7 myń tonna júk tasymaldanyp, bir jylǵy deńgeıden 36,1 paıyzǵa azdaý boldy. Al shildede ushaqpen 2,4 tonna júk jetkizilip, maýsym aıyna qaraǵanda 8,8 paıyzǵa ósti.

«2022 jylǵy shildeniń qorytyndysy boıynsha jolaýshylarǵa arnalǵan áýe komanııalarynyń qyzmet quny jyl ishinde 26,6 paıyzǵa ósti. Qyzmet kórsetý qunynyń edáýir ósýi Túrkistan (56,8 paıyzǵa), Jambyl (46,7 paıyzǵa), Shyǵys Qazaqstan (44,5 paıyzǵa) oblystarynda tirkeldi. Soltústik Qazaqstan oblysynda qyzmet quny ózgermegegen, sondaı-aq Aqmola oblysynda 8,7 paıyzǵa, Qyzylorda oblysynda 8,8 paıyzǵa, Pavlodar oblysynda 17,7 paıyzǵa arzandady», - dep atalyp ótken taratylǵan aqparatta.