Qazaqstandaǵy áskerıler úshin modýldi úıler salynbaq

NUR-SULTAN. QazAqparat – Qazaqstandaǵy áskerıler úshin modýldi úıler salý josparlanyp otyr. Bul týraly QR Qorǵanys mınıstriniń orynbasary Daryn Tuıaqov aıtty, dep habarlaıdy QazAqparat tilshisi.

Aıta keteıik, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy maquldandy.

Qujat aıasynda modýldi turǵyn úı qurylysy eskerilgen.

«Birinshiden, modýldi turǵyn úıler paıda bolady jáne olar tıisti standarttarǵa sáıkes keledi. Osy nysandar qyzmettik baspana retindi beriledi, sondaı-aq mobıldi bolady. Mundaı turǵyn úılerdi basqa jerge tasymaldaý múmkindigi jasalady. Qazirgi kezde turǵyn úı qurylysynda kóptegen jańa tehnologııalar shyǵyp jatqanyn bilesizder. Bul úıler tez salynatyn, tasymaldanatyn nysandar jáne olar úsh bólmeli baspana úshin qarastyrylǵan barsha normalarǵa saı bolady. Qajetti kommýnıkatsııalarmen jasaqtalady», - dedi D. Tuıaqov Májilis ǵımaratynda tilshiler saýalyna jaýap bere otyryp.

Onyń aıtýynsha, zań jobasynda qajettilikter aıasynda Qorǵanys mınıstrligi osyndaı modýldi úılerdi áskerıler úshin satyp alýy múmkindigi eskerilgen.

«Áskerı qyzmetshilediń óziniń otbasymen birge bir óńirden basqa óńirge jınaqy ǵana qonys aýdaratyn jaǵdaılar bolady», - dedi mınıstrdiń orynbasary.